Shillong, Nailar 18: Ka khubor ba la ïoh na ki pulit la ïathuh ba u Abhijeet Anand u la phah ka jingujor ba ha ka 30 tarik u Naitung, 2024 ha ka por kumba 10 baje mynstep, ki runar bym lah ban ithuh ki la tuh haduh 48 tylli ki battery cell kiba shongdor T. 1.95 lak napoh ka jaka ba la buh ïa u tower hapoh Riangdo (WKH).
Ha kawei pat ka jingjia ki pulit ki la ïathuh ba kawei ka longkmie ka la phah ka jingujor ba ha ka 15 tarik u Jymmang, 2024 ha ka por 5 baje janmied, ka la kynnoh ba uwei u rangbah uba la tip da ka kyrteng F. Lamurong u la shim ïa ka mobile phone jong ka bad u la byrngem ïa ka.
Shuh shuh ha kawei pat ka jingjia ki pulit ki la ïathuh ba uwei u nongshong shnong uba na East Jaiñtia Hills u la phah ka jingujor ba ha ka 2 tarik mynta u bnai ha ka por 7 baje mynmied, uwei u briew kiba la shah kynnoh da ka kyrteng F. Lamurong, u la byrngem ïa u da ki khanshi, bad u la knieh da bor ka pisa kumba T. 7,000/- bad u la byrngem ruh ban pynshitom.
Shuh shuh ki pulit ki la ïathuh ba u Islife Malang u la phah ka jingujor ba ha ka 27 tarik u Nailur, 2023, uba mihkhmat na ka Gill Company u la shem ba ki runar bym lah ban ithuh ki la tuh ïa ki tiar jong u mobile tower kiba shongdor kumba T. 21,17,815/- napoh ka jaka ba la buh tower kaba ha Kseh Lymbrang, shnong Mukhla (WJH).
Ha kawei pat ka jingjia ki pulit ki la ong ba u Vishal Singh u la phah ka jingujor ba ha ka 8 tarik mynta u bnai ha ka por kumba 10 baje mynstep, ki runar bym lah ban ithuh ki la tuh ïa ka thuk thuk kaba don u nombar AS-34-3680 kaba la long trai da u mama jong u na Fancy Valley, Tura (WGH).
Shuh shuh ha kawei pat ka jingjia ha ka 10 tarik mynta u bnai, 2024 ki bor pynïaid jong ka Civil Hospital, Tura (WGH) ki la buh ka jingujor ba dangshen ki runar bym lah ban ithuh ki la tuh ïa bun tylli ki tiar kiba kynthup ïa ki mattress, ka bedcover, ka singkhlieh bad kiwei kiwei napoh Hospital ha Lepers’ Colony, Tura.
