Shillong, Jymmang 16: Ka khubor ba la ïoh na ki pulit la ïathuh ba ha ka janmied jong ka 13 tarik mynta u bnai ki runar bym lah ban ithuh ki la shim ïa ka thuk thuk kaba don u nombar ML-05Q-7605 kaba la long trai da u Bah Elbert Syiemlieh na ka bynta ban ñiah pyrshang ha Golf Links, Polo, Shillong hynrei ki khlem leit pynphai biang sha u trai. Hynrei ha ka 14 tarik mynta u bnai, hadien ka jingïoh jingtip kaba biang ki pulit ki la leit sha ka ïing jong kawei ka longkmie kaba la ithuh kyrteng da ka B Laitphlang ha Mawtawar, Mawlai, Shillong, ha kaba la donlang u Nathan Laitphlang ba la 26 snem ka rta bad uwei u Hardbornson Lamurong ba la 28 snem ka rta ha kaba hadien na ka liang jong ki pulit ki la ïoh ban kurup ïa katei ka thuk thuk na ka ïing jong u Hardbornson Lamurong ha Mawlai Mawroh Umsohkhlur, Shillong.
Ha kawei pat ka jingjia ki pulit ki la ïathuh ba u Zawlthanthuom na ka shnong Madanrting Pdengshnong, Shillong u la phah ka jingujor ba ha ka 14 tarik mynta u bnai ha ka por 7.45 baje mynmied, uwei u nongshong shnong uba la ithuh kum u ‘Paul’ u la prong hapoh ka ïing bad u la tuh ka pisa kumba T. 2,63,531/-. Ïa kane ka jingjia la ïohi ruh lyngba ka CCTV.
