SHILLONG, Jymmang 16: U Bah Hamlet Dohling uba dei u nongai buit jong u Myntri Rangbah ka jylla, ha ka sngi Palei u la pynhap pyrda noh ïa ka 3rd Inter School Sport Meet 2025 jong ka Khasi Jaintia Presbyterian Synod Sepngi kaba la pynlong ha Madan SAI, NEHU, Shillong.
ïa kane ka 3rd Inter School Sport Meet 2025 la sdang ha ka 14 tarik mynta u bnai Jymmang bad la pynkut noh ha ka sngi Palei, bad ka phang pdeng jong kane ka Inter school meet kadei “Beh Pyrshah Sha Ka Thong”.
Haba phai sha kane ka 3rd Inter School Sport Meet 2025 jong ka Khasi Jaintia Presbyterian Synod Sepngi, la wan ban ïa shim bynta da 54 tylli ki school kiba dei na ki saw tylli ki zone. Kine ki saw tylli ki Zone, ki kynthup ia ka Mawkyrwat, Nongstoin, Sohra bad Shillong Zone.
Ka jingthmu ba kongsan jong ka Khasi Jaintia Presbyterian Synod Sepngi ban pynlong ïa kane ka Inter School Sport Meet ka long ban plie lad ïa ki khynnah skul ba kin ïa ithuh iwei ïa iwei pat kiba dei na ki skul Balang jong ka Presbyterian.
Haba kren kum u kongsan ha ka sngi pynkut ïa kane ka Inter school meet u Bah Hamlet Dohling u la ai ka jingïaroh ïa ka Organising Committee kaba la lah ban pynïaid beit pynïaid ryntih bad kaba jop ïa kane ka programme.
Kum kane ka programme ka ïadei dor bha bad kum kane ka por ban pynlong ïa kum kine ki sport meet bad ka jingmih ryntih ki khynnah skul ban ia shim bynta ha ki jingïalehkai bapher bapher kala dei lypa ka jingjop ïa ki namar ba kim shym la lehraiñ ban pyni ïa ka sap ka phong kaba ki don ong u Bah Hamlet.
Haba phai sha kane ka sport meet ïa kaba la sakhi ïa ka march pass kaba wan ba-ar na ka liang ki kynthei la ïoh rah da ka Mairang Presbyterian Secondary School bad kaba la ïoh rah ïa ka nam jop kadei ka school KJP, Shillong.
Na ka liang ki shynrang ïa ka nam ba-ar la ïoh rah da ka Jakrem Presbyterian Secondary School bad ia ka nam lahduh la ioh rah da ka Pariong Secondary School.
Ka Overall Champion, ne ka lahduh ha baroh ki jingïalehkai ka leit sha ka Nongtoin Zone kaba la rah shi syndon kum ka lahduh.
