Shillong, Nohprah 01 : Watla u Jaskirat Singh Sachdeva u la khyrwit marwei 86 ron na ki 89 bol bad khlem shah pynhap wicket, hynrei ka Meghalaya ka la mad ka nam rem ha ka jingïalehkai ba khatduh jong ka lympung U-25 Men State A Trophy da 41 ron ha ka Kerala ha ka jingïalehkai hynne ka sngi Palei ha Mohali.
Watla ka la shah rem, hynrei kane kadei ka jingïalehkai ba ka Meghalaya ka la lah ban ïalehkai bha jong katei ka tournament khamtam ba ka la hap ban ïakhun pyrshah ïa ki team kiba khlaiñ hapoh ka ri. Ka Kerala ka pyndep ha ka kyrdan ba saw na ka Group D.
Haba phai sha ka jingïalehkai, ka Meghalaya kaba la jop ïa ka jingkynting pisa ka la kam ban kawang bol nyngkong ha kaba ka la pynhap lut baroh ki wicket jong ka Kerala kaba kamai 270 ha ki 48.3 over. U PM Santhosh u khur 3 wicket ai kamai 41 ron bad u Lokesh Turaha 3 wicket ai kamai 45 ron kiba dei ki arngut ki rangkawang bol kynsai ka Jylla ha katei ka jingïalehkai. U Manish Sharma u ïoh 2 wicket ai kamai 38 ron nangta u Agreas Chamcham Sangma 1 wicket ai kamai 52 ron bad u Jaskirat 1 wicket ai kamai 68 ron.
Ki saw wicket jong ka Kerala kiba la shah pynhap kidei tang ha ka jingkamai ba hynñiew ron ha kaba ka Meghalaya ka khlem ailad ba ka kynhun ïakhun pyrshah kan kynjoh sha ka 300 ron.
Baroh ki rangtied ka Meghalaya ki la lah ban tied bol bha ha ka jingbeh ïa katei ka ron hynrei ka khlem lah pat ban kynjoh sha katei ka thong ba la buh da ka Kerala.
Ka Meghalaya ka la kynjoh sha ka 150 ron haduh ka over ba 40 hadien ba u Jaskirat bad u Md Asif Khan ki la sdang ban tied bha hynrei ki khlem lah pat ban kynjoh ïa ka thong. U Jaskirat u la pyndep da kaba khyrwit 86 ron bad neh ka wicket haduh ba kut da kaba khyrwit phra tylli ki four bad ar tylli ki six. U Josiah Momin u kamai 28 ron bad u Kevin Christopher 20 ron.
