Rem biang ka Meghalaya ha ka jingïalehkai Senior Women’s One Day Trophy

0

Shillong, Kyllalyngkot 19 : Ka kynhun ki thei ïalehkai kriket jong ka Meghalaya ki la mad biang ka nam rem ha ka lympung ïalehkai Senior Women’s One Day Trophy. Ha ka jingïalehkai hynne ka sngi Palei ha Nagpur ka Meghalaya ka la rem da 259 ron ha ki thei ïalehkai jong ka Rajasthan.
Ka Meghalaya hadien ba ka la jop ïa ka jingkynting pisa na ka jingïakhun na ka Group C, ka la ailad nyngkong ïa ka Rajasthan kaba la kamai 312 ron duh noh 3 wicket ha baroh ki 50 over.
Ka Riticia Nongbet ka ïoh ban khur 2 wicket ai kamai 48 ron ha ki 10 over ba ka la ïoh ban kawang bol. Ym tang ba ka la lah ban ïalehkai bha ha ka liang ka jingïoh khur wicket, hynrei kadei ruh ka thei kawang bol kaba tbit tam napdeng ki hynñiew ngut ki thei kawang bol ka Meghalaya. Ka Ajima Sangma ka ïoh shi wicket bad ai kamai 63 ron.
Watla ka la kamai 130 ron ha ka sngi Balang pyrshah ïa ka Mumbai, ka Meghalaya ka khlem lah ban kynjoh sha ka thong ba la buh da ka Rajasthan ha kaba ka la shah pynliem lut baroh ki wicket da kaba kamai tang 53 ron. Dei tang ka Sejal Raut kaba kamai bun ron da 13 ron watla ka la kamai 44 ron ha ka jingïalehkai pyrshah ïa ka Mumbai bad ka Daiaka Warjri ruh ka la ïarap kamai 10 ron na bynta ka Meghaaya.
Ha ka jingïalehkai kaba bud, ka Meghalaya kan ïakhun pyrshah ïa ka Assam ha ka sngi Saitjaiñ. Ka Assam ruh ka la mad nam rem ha ki arsien ïalehkai.

Leave A Reply

Your email address will not be published.