Shillong, Kyllalyngkot 19 : Ka Meghalaya kan sa mih madan biang ha ka sngi kaba saw ha ka jingïakhun semifinal na ka Plate Group jong ka Ranji Trophy pyrshah ïa ka Bihar ha kaba ka donkam da 436 ron ban ïoh ka jingjop.
Ka Bihar ka la shah pynhap lut baroh ki wicket ha ka inning kaba ar da kaba kamai 164 ron ha ka jingïalehkai hynne ka sngi Palei ha madan ïalehkai kriket jong ka MCA ha Polo, ha kaba u Rajesh Bishnoi uba dei u guest professional u khur 6 wicket ai kamai 30 ron na bynta ka Meghalaya, kaba dei ruh ka jingïoh khur bun wicket kaba thymmai na bynta jong u ha ka jingïalehkai first-class. Da 294 ron ba ka la lamkhmat ha ka inning kaba nyngkong, ka Bihar ka la buh ka thong da 459 ïa ka Meghalaya ban jop. Ha ka pali tied, ka Meghalaya ka kamai 23 ron duh noh 1 wicket.
Haba bteng biang ïa ka jingkamai 28 ron khlem da duh wicket, ka Bihar ka la kamai shuh sa 30 ron shwa ba kan duh noh ki lai tylli ki wicket. Ïa ka wicket kaba nyngkong la ïoh da u Akash K Choudhury uba khur 3 wicket ai kamai 34 ron bad ha kawei pat ka over, u Bishnoi u la ïoh ban pynhap ïa ka wicket jong u Sachin Kumar Singh bad ïa u Bipin Saurabh uba kamai century ha ka inning kaba nyngkong.
Kadei ruh ka jingkhur wicket kaba biang tam bad kaba khatduh ha kane ka sngi na bynta ka Meghalaya ha kaba u Bishnoi u la ïoh ban pynhap ïa ka wicket u Babul Kumar uba kamai 51 ron ïa kaba la ïoh ban kem bol da u Tarique Siddique tang ha ka shi bol hadien ka jingbamja sngi.
U Bishnoi u la lah ban kawang bol bha ha kaba ki rangtied ka Bihar ki khlem da ïoh kamai ron, da kaba ai kamai tang 30 ron ha ki 25 over, ha kaba 16 over u khlem ai kamai ron. Ka jingïoh khur wicket kaba u don mynshwa kadei 6 wicket ai kamai 60 ron kaba dei ruh ha ka jingïalehkai pyrshah ïa ka Bihar ha ka jingïalehkai ha u Nohprah.
U Swarajeet Das u ïoh 1 wicket ai kamai 25 ron lyngba ka jingïoh kem bol da u Kishan Lyngdoh.
Kumba ka Bihar ka la khyllem lut baroh ki wicket da kaba kamai 164 ron, ki player ki la thong jahthait shi por ban dih sha sngi bad ka Meghalaya kaba la wan ban tied ka khlem ïoh lad shuh ban kamai ron bad dei tang u Raj Biswa bad u Kishan Lyngdoh ki kamai mar 9 ron hynrei u Kishan Lyngdoh u la shah pynhap wicket noh ha kaba kut jong ka over kaba khyndai.
Hadien kane u Shah u la wan ban tied bol hynrei u khlem pat ïoh kamai ron katba u Biswa u kamai 13 ron (not out).
