Shillong, Kyllalyngkot 17 : Ka Bihar ka la tied 329 ron bad duh noh 6 wicket ha ka sngi sdang jong ka jingïalehkai phainal pyrshah ïa ka Meghalaya na ka Plate Group jong ka Ranji Trophy ha ka jingïalehkai hynne ka sngi Ba ar ha madan Polo.
U Bipin Saurabh marwei u kamai century (177) bad u Sachin Kumar Singh ïa ka shiteng spah ron (75), ha kaba ki rangïalehkai ka Meghalaya ki la pynlehnoh ei katto katne ki jingïoh kem (catche) ban pynhap wicket. Kane kadei ka jingkamai spah ron kaba ar na ka bynta u Saurabh ha ka jingïalehkai first-class bad kumjuh ruh ka jingïoh ban kamai bun ron.
U Saurabh u la ïoh ban kamai spah ron nyngkong eh kadei ha ka jingïalehkai pyrshah bad ka Meghalaya ha ka jingïalehkai group stage kaba la long ha u Nohprah 2022. Ka Meghalaya ka la jop ïa ka jingïalehkai ka la sdang ban ïalehkai bha ha ka por mynstep hadien ba ka la jop ïa ka jingkynting pisa bad kam ban kawang bol nyngkong.
U Rohit Shah u la ïoh ban kem bol ha ka jingmih madan ha kaba kum kane ka jingïalehkai jong ka Ranji Trophy ban ïarap pynïoh 1 wicket ïa u Akash K Choudhury uba ai kamai 55 ron kaba dei ruh ka wicket kaba nyngkong ban pynhap ha kane ka sngi. U Abhishek Kumar u ïoh 2 wicket ai kamai 78 ron, ha kaba u umpire u la ai pynhap wicket ïa u Basukinath lyngba ka lbw.
Ha kaba kum katei ka por ka Bihar ka kamai 14 ron duh noh 2 wicket hynrei ka jingïalehkai ka la kylla syndet. U Sachin u la kamai shiteng spah ron (half-century) pyrshah ïa ka Meghalaya ha u bnai ba la dep bad ma u ha ryngkat u Saurabh ki la mih lang ban tied ha kane ka sngi.
Kitei ki arngut ki la khurwit shibun tylli ki boundary, u Sachin u khyrwit 14 tylli ki four bad u Saurabh 12 tylli ki four bad 11 tylli ki sixes.
Baroh arngut ki la lait im na ka jingshah pynhap wicket hadien ba ki rangïalehkai ka Meghalaya ki la pynleh noh ei ïa ki katto katne ki jingkem bol. U Sachin u la kynjoh sha ka jingkamai shiteng spah ron hadien ba u la lait na ka jingshah pynhap wicket katba u Saurabh lyngba katei ka jingbym ïoh kem bol u la kynjoh sha ka spah ron da kaba khyrwit ïa ka hynriew ron.
Kitei ki shijur kiba buh ka jingkamai ba 143 ron ha ka jingduh noh ba lai wicket, ki la kamai jan hynñiew ron ha ka shi over shwa ba u Sachin un shah pynhap wicket ha ki kti u Arbin Singh.
Hadien ka jingkhyllem wicket noh u Sachin ka jingkamai ron ruh ka la sdang ban duna hynrei ka Bihar ka la bteng biang bad ïoh kamai ron, ha kaba u Sakibul Gani u la kamai 43 ron bad kynjoh sha ka 119 ron ha ka jingkamai ron lang bad u Saurabh. U Gani ula shah pynhap wicket noh lyngba ka jingïoh kem bol da u Punit Bisht bad u Kumar ha kaba khatduh u la ïoh pynhap wicket ïa u Saurabh ba la ïoh kem bol da u Choudhury.
Ka Meghalaya kan hap ban ïalehkai bha tyngeh ban pynhap ïa ki wicket ba dang sah jong ka Bihar ha ka sngi kaba bud.
