Rakhe’ World Rabies Day’ ha Jowai da kaba leit ai injek ïa ki ksew bad ai jinghikai paidbah

Jowai, Nailur 28: Shi bynta na ka World Rabies Day 2026 ha Jowai la rakhe ïa kane ka sngi da kaba pynlong ïaka prokram halor ka jingdonkam ban ai injek ïaki ksew bad ka jingleit ai jinghikai pynsngewthuh sha ki paidbah bad kane ka prokram kan kut haduh ka 30 tarik u Nailur, 2026.
Haka jingïalang bala long mynta ka sngi 28 tarik ha ophis ka District Medical & Health Officer, Jowai, bala khot pynlong da ka tnad ka koit ka khiah (IDSP & NRCP) WJHD ha ryngkat ka jingïatreilang ka tnad Veterinary, ka ophis u Deputy Commissioner bad ka JBF (Just Be Friendly) India Trust and Mission Rabies.
Ïa ka jingïalang la pynïaid da ka DM&HO Dr. P. Shylla kaba la ai ruh ka jingkren pdiang sngewbha, la ïoh ka jingkren na Dr. Bahiam Kupar C. Nongrum (IDSP) & District Nodal Officer, NRCP, Dr. R. Bamon na ka District Veterinary, na u Shishankar na ka JBF Trust, katba ïa ki kyntien ai khublei la ïoh na u Ronald Lyngdoh uba dei u District Epidemiologist.
Ha kane ka jingïalang ba ïoh ban batai bniah halor ka jingïada na ka jingshah dait ksew, da kaba kyntu jur ïa ki nongri ksew ba kin leit ban ai injek ïa ki ksew jong ki katkum ka jingdonkam, khnang ba kin lait na ka jingpang Rabies. Kum ki paidbah nongshong shnong hapoh ka sor Jowai haba don ki ksew ba lamwir dei ban pyntip mar mar da ka jingïatreilang nyngkong bad ka tnad Municipal, Firebrigade bad ka tnad pulit.
Halor ka jingtreikam jong ka JBF (Just Be Friendly) India Trust and Mission Rabies u Shishankar ula batai ïa kane ka kynhun la seng ban ïakhun naka bynta ban pynduhjait ïa ka jingpang Rabies haki ksew, kum ka kynhun ka long kaba nyngkong ban ai jingïada da kaba leit kem ïa ki ksew surok bad ai injek ïaki kaba la sdang ban treikam naduh u snem 2007 hapoh ka ri.