Shillong, Nailur 28: Ka seng Hynñiewtrep Youths’ Council (HYC) Nongtrai Unit, East Khasi Hills District, Meghalaya, ka la ïoh bat ïa arngut ki briew ha Nongtrai ha ka 26 tarik Nailur 2026, hadien ka jingtip ba la ïoh halor ka jingsuba ba kine ki briew kila rung shapoh Meghalaya na Bangladesh lyngba kawei ka jaka kaba don ha khappud.
Kine ki arngut kila thmu ban wan kiew sha Shillong bad hadien kata ban leit sha kiwei pat ki jaka. La buh ïa ka FIR No. 15(09)2026 ha Mawsynram Police Station halor kane ka jingjia lyngba u Samla Buddien Shabong, Assistant Secretary, Nongtrai Unit.
Katkum ka FIR, kine ki arngut, kiba kyrteng u Jhinuk Hijrani, 22 snem ka rta, bad ka Priyanka Kumari, 20 snem ka rta, la ïoh bat ïa ki bad lap ha ka shnong Nongtrai katba ki dang shong ha ka kali kaba don ïa u registration number ML 05 AC 5971. La pynngat mukotduma ïa kine baroh arngut hapoh ka Section 12(1)(a) bad (c) jong ka Passport Act, 1967. La aiti ïa ka jingtohkit halor kane ka jingjia sha Mawsynram Police Station.
Ka HYC Nongtrai Unit ka kyntu ïa ki bor ba dei khmih ban pynlong ïa ka jingtohkit kaba bniah, kaba laitluid bad kaba hok, khnang ban pynshisha bad lap ïa ka jinglong trai ri jong kine ki arngut, ban tohkit ïa ki kot ki sla jong ki, ban tip ïa ka lynti kaba kila wan rung bad ban shem la don ne em kano kano ka jingïarap ne jingïatreilang jong kiwei pat ki briew ne ki kynhun kiba lah ban don bynta ha kane ka jingjia.
Ka HYC ka kyntu ruh ïa ki nongshong shnong, khamtam ïa kiba sah ha ki jaka khappud, ban long kiba husiar bad ban pyntip mar mar sha ka thanad jong ki pulit kaba hajan ne sha ki bor ba dei khmih lada ki ïohi ia kino kino ki jingwan rungtuh jong ki briew na Bangladesh ne kino kino ki kam kiba i suba, khnang ba ka jingrung beain bad kiwei ki kam pyrshah iaka ain kin lah ban shah khanglad.
