Shillong, Nohprah 13: Da ki hajar ngut ki parakur Warjri ki la poi sha ka sngi rakhe ïa ka lyngkhuh snem ba arphew san jong ka Seng Kur Warjri ha shnong Thynroit ha ka 12 tarik mynta u bnai. Ka rakhe baphuh baphieng la wan pynshngaiñ lang da ki rangbah jong ka Synjuk Ki Rangbah Kur Ka Bri U Hynñiewtrep bad ki samla nongialam jong ka seng Hynñiewtrep Youth Council. Ka jingrakhe ka pynlong ruh ïa byllai ki kam pyninam ïa ki sap ki phong jong ki khynnah bad samla na ka kur Warjri ha baroh shisnem ki ba kynthup ïa ka Football, Basketball, Painting, Essay, Poetry, Dancing, Music bad ha ka step jong ka sngi long dorbar la pynlong da ka Marathon. Hadien kata la bteng ka Dorbar ba la kren da ki rangbah kur Warjri bad la sam ïa ki khusnam jop jong ki samla ki ba lahduh ha ki kam pynisap bapher bapher bad la pyninam ruh ïa ka rwai ka shad na ki nongjop bad nonghikai ba kynthup ia ka shad da I Dapalei Warjri bad ka kynhun bad ka jingrwai da I Noury Warjri.
Nalor ki jingïakob pyninam bapher bapher, la pynkup burom ruh ïa ki samla na ka kur ki ba la kiew shaphrang ha la ki jingtbit ba shimet jong ki ba kynthup ïa ka samla Ellerene Warjri ba la ioh ka nam lahduh kyrdan ba-ar ha ka Bachelor of Education Examination, 2023, NEHU, Obinas Warjri ba la ïoh takma ksiar ha ka 5th Annual National Martial Arts Games, Badahunshisha Warjri ba ioh kyrdan ba-ar ha ka Poster Contest 2023 da ka Forest and Environment Department, Meghalaya ha ka ba synrop bad ka Global Tribal Forum. Kumjuh ruh la pynkup burom ia ki rangbah kur ki ba la kitkhia ia ka Seng Kur Warjri naduh ba la seng na arphewsan snem mynshwa, bad la ainam aiburom ïa u khliehduh ba nyngkong, Bah D L Warjri (bam kwai ha dwar U Blei) ba la pdiang sngewbha da ka takma sahnam ha I kmie ki khun Kong P O Kharkongor, ba la synran lang bad ki khun ki kti.
Ha ka ba pynwai noh ïa ka jingrakhe la pynhiar lama da ki rangbah kur Warjri ba kynthup ïa u Bah George A Warjri, Bah Sunshine Warjri, Bah P Barkos O Warjri, Bah R V Warjri, Bah Kestar Warjri bad kiwei kiwei ki rangbah kur na ka seng kmie. Ha kane ka sngi rakhe la ïoh jingkren na u Bah Shakliar Warjri, myntri sorkar jylla, u Rangbah R L Kharpran, Symbud Khliehduh ka Synjuk ki Rangbah Kur bad na u Samla Roy Kupar Synrem, khliehduh ka Hynñiewtrep Youth Council. U Bah Shakliar Warjri u la pynpaw ka jingkmen bakhraw na ka bynta ka jingrakhe lyngkhuh arphewsan snem jong ka Seng Kur Warjri bad u la kyntu ia ki rangbah ban kin dang ïai duriap ban pyniar ïa ki kam jong ka Kur Warjri. U Rangbah R L Kharpran u la kren mardor halor ka jingdonkam ban tehsong ïa ki seng kur ha satlak ka Ri Khasi bad ban pynskhem ia ka longkur longkha. Kum shi bynta jong ka jingrakhe ïa ka lyngkhuh arphewsan snem jong ka Seng Kur Warjri la rakhe ruh ïa ka snem thymmai katkum u bnai bneng ki Khasi ba la maitphang da u Bah Raphael Warjri bad la ïoh jingkren na u Bah Roy Kupar Synrem u ba la kyntu ïa ki paidbah ban long ki ba tipkur tipkha, tipbriew tipblei bad kamai ïa ka hok da ka ba kdew artat ba ka tipkur tipkha ka long ka ba kongsan na ka bynta ka lawei jong ka jaitbynriew ha baroh ki liang.
