Nongpoh, K’Lyngkot 31: Ki samla jong ka shnong Nongthymmai 14-15 mer Byrnihat kila ioh ban sdang noh ïa ka taiew lehkmen jong ki samla bad ha ka juh ka por ka jingrakhe ïa ka jubili rupa jong ka jingïaid lynti ba 25 snem ka seng Samla ha katei ka shnong, ryngkat ka jingangnud ban wanrah ka jingïatylli, ka jingïeid bad ka jingïajan hapdeng baroh ki khun samla jong ka shnong na ka bynta ban leh shibun ki kam ki ban kyntiew ïa ka shnong.
Ïa katei ka taiew lehkmen jong ki samla bad ka jingsdang ban rakhe ïa ka jubili rupa la wan ban plie paidbah hynnin ka miet da u Samla Kitboklang Nongphlang Vice President ka FKJGP sengkmie kum u kongsan ha ka jingdonlang u Bah Lumlang Mawnai symbud kongsan, Bah Luistar Lyngdoh President ka FKJGP NKHD, Samla Noah Khongstid President Seng Samla, Samla Kitbor Suting Secretary bad kiwei kiwei ki riew rangbah bad ki khun samla jong ka shnong.
Haba kren ha katei ka sngi na ka liang u Samla Kitbok Nongphlang u la ai ka jingïaroh ïa ka seng Samla Nongthymmai 14-15 mer halor ka jingpynlong jong ki kum katei ka taiew lehkmen jong ki samla ba kum ki khun samla kin ioh ban lehkmen lyngba ki prokram bapher bapher ha kane ka taiew ba kum ka seng samla kala pynkhreh ruh ïa ka jingrakhe jubili rupa jong u mawmer ba 25 snem ka jingïaid lynti.
U la kyntu ruh ïa ki khun samla ba kin ïatylli, ïa ïeid bad long kawei namar ki samla ki don ka bynta kaba khraw ban kyntiew ïa ka shnong ka thaw.
