Nongpoh, K’lyngkot 31: Kum kawei na ka jingangnud ka seng ban kyntiew ïa ki kam ïalehkai sport ha Ri Bhoi District bad ruh ba ki samla don sap kin dang kiew shaphrang ha ki jingïalehkai sport bapher bapher, ka Ri Bhoi Youth Welfare Organization (RBYWO) mynta ka sngi ka la shim sa da kawei ka sienjam ban pynsgnew sha ka sorkar lyngba u myntri ba dei peit ïa ka tnad sport na ka bynta ban kham phai khmat sha ka Ri Bhoi District.
Kane jingshim rai ka RBYWO ban pynsngew pynsngap sha ka sorkar jylla lyngba ka dorkhas, ka dei ka jingsngewkhia ka seng halor shibun ki jingduna kiba ïa dei na ka bynta ban kyntiew ïa ki kam ïalekai sport ha Ri Bhoi, ba ka Ri Bhoi District wa la ka la pynmih shibun ki nongïalehkai sport kiba la rah ïa ka nam ka jylla bad haba phai pat sha ki lad kyntiew ïa ki samla kam pat don satia ha Ri Bhoi District.
Kumba la pynpaw da u Vice President ka RBYWO, u Elvis Kyrsian u la ong ba ka seng ka angnud ba ki lad ai jingmyntoi ïa ki khun samla ha Ri Bhoi ka dei ban don bad kumba long haduh mynta ka Ri Bhoi wat la ka la pynmhi shibun ki nongnïalehkai sport bad kam pat don pat tang kawei ka stadium ba biang bad ruh wat tang ka artificial turf ruh kam pat don satia haba ïa nujor ba kiwei ki district ha ka jylla.
Namarkata, kum ka jingplie lad plie lynti ïa ki khun samla ba donsap ka Ri Bhoi, ka seng mynta ka sngi ka la pynher da ka dorkhas sha u Myntri ba dei peit ïa ka tnad Sport bad ka jingkyrpad ka seng ka long ba ka sorkar jylla lyngba ka tnad Sport ka la dei ban thaw ka lad ka lynti na ka bynta ban pynioh ïa ka stadium kaba biang bad ruh wat ha ka madan artificial turf khnang ba kan ai shisha ka jingmyntoi na ka bynta ki samla ba don sap ha ka jingïalehkai sprot na Ri Bhoi District, u la bynrap.
