Shillong, Nailur 27: Ha ka sngi Thohdieng ka tnat ka Koit ka Khiah jong ka South West Garo Hills, ha ka jingïatreilang bad ka Veterinary bad ka tnat Pule Puthi ki la pynlong ïa ka World Rabies Day ne ka jingpang dait ksew ha Birin Nuchong School, Ampati. Ha kane ka snem ka phang jong kane ka jingrakhe ka dei, “Breaking Rabies Boundaries,” kaba la banjur ruh halor ka “One Health Approach to Rabies Elimination.”
Ha kane ka prokram la wan ban long kongsan da ka Crystal R. N. Sangma, BDO Betasing, bad kiwei kiba la shah khot sngewbha kiba kynthup ïa u Emphul Marak, SDSEO, bad Dr. Gilsang Marak, AH & Veterinary Officer. Ki samla pule bad ki nonghikai ka Birin Nuchong School.
La pynlong ruh ïa ka jingïakob jingshna ïa ki poster ha kaba ki khynnah pule ki la sei ïa la ki jong ki sap bad ban sngewthuh ruh ïa ka jingdonkam ban ïada na ka jingpang shah dait ksew (rabies). La sam ïa ki khusnam sha ki nongjop da ka kongsan. Ha ki jingkren jong ka, ka Crystal R. N. Sangma ka la ïaroh ïa ki nongjop bad ka la kren ruh halor ka jingdonkam ban rakhe ïa ka World Rabies Day, naba ka long kaba kongsan ban pynsngewthuh bad ban shim ki sienjam ban ïada bad ban pynduh jait ïa ka jingpang dait ksew (rabies).
Na ka liang Dr. Gilsang Marak la batai khambha shaphang ka jingpang rabies, kaba kynthup ïa ki jingkren halor kane ka jinglong jong ka jingpang, ki lad jingïada, bad ka bynta ban ai ïa ka injek. U la banjur ïa ka jingthmu ban pynduh jait ïa ka rabies ha India la kumno kumno ha u snem 2030.
Na ka liang u Emphul Marak la ïathuh shaphang ka jingsdang ka kam ai injek bad ka jingma jong ka jingpang rabies, bad ka jingdonkam ruh ban ai injek ïa ki jingri bad kumjuh ruh ïa ki briew.
La ïoh ruh ka jingkren na Dr. Matgrik K. Sangma, Medical and Health Officer bad District Nodal Officer na ka bynta ka National Rabies Control Programme. Nangta na Dr. Sangma ban ïasyllok ïa ki sienjam kiba mardor ban buddien halor ka jingshah dait ha ki mrad bad ba ka jingai injek rabies kam dei ban don ka jingma ïa ki longkmie kiba armet bad ki khyllung khynnah.
Ha kaba kut na ka liang kiba ïashim bynta ki la shim ka jingkular ban kyrshan ïa ka jingpynduhjait ïa ka jingpang rabies, kaba la pynbud da ka jingïaid paidbah ki samla pule bad ki nonghikai ka Birin Nuchong School ban pynlong kum ka jingpynsngewthuh paidbah bad ban tehlakam ïa ka rabies hapdeng ki nongshong shnong ka Ampati.
