Mawkyrwat, Nailur 01 : Ka Referees Committee (RC) jong ka Mawkyrwat District Sports Association (MDSA) mynta ka sngi ka la ïoh ban rakhe ïa ka sngi ba kyrpang ka ‘Referees Day 2022’ ha kaba ïa kane ki la pynlong hapoh madan Artificial Turf jong ka MDSA, Mawkyrwat South West Khasi Hills District.
U kongsan ha kane ka sngi u dei u bah Damang Synkon, District Sports Officer, South West Khasi Hills District, u bah P. Wanniang, General Secretary ka MDSA kum u Symbud kongsan ryngkat ka jingïadonlang naduh ki nongkitkam jong ka Mawkyrwat District Sports Association (MDSA) bad kiwei de ki ‘riew rangbah.
U bah Damang Synkon, District Sports Officer, South West Khasi Hills District haba kren kum u kongsan ha kane ka sngi ba kyrpang jong ki referees u la ai ki kyntien jingkyrkhu kyrdoh ïa ki Referees, ka Referees Committee bad ïa baroh ki nongkitkam kiba la long ka daw jong ka jingjop ha ki jingïalehkai kynjatbol kiba na ka liang ka ophis ka ju pynlong. Namarkata, u la ruh ki kyntien jingkitbok ïa ki ba kin nang ïai trei shitom shuh shuh nangne shakhmat khnang ba ka kam ïalehkai ha kane ka distrik kan nang ïai kiew lyngba ka jingdon jong ki referees kiba la pyntbit.
U bah P. Wanniang, General Secretary ka MDSA kum u symbud kongsan ha ka jingkren jong u, u la ai khublei kyrpang ïa ka komiti bad ïa ki referees da kaba ong, “ba ka jingïaid beit ïaid ryntih jong ki jingïalehkai kynjatbol hapoh jong ka Mawkyrwat District Sports Association (MDSA) ka dei namar ka jingdon jong ki referees ha ryngkat ka jingtrei shitom jong ki ban pyntyllun ïa kiba bun ki kam bad ka dei ruh namar ka jingdon jong ki referees kiba tbit ban pynïaid ha ki jingïalehkai.
Ha kane ka sngi la ïoh ka jingkren lyngkot na u bah M.D. Jyrwa uba dei u Secretary barim jong ka Referees Committee uba la ïathuh lyngkot ïa ka jingsdang bad ka jingtreikam jong ka komiti ha ryngkat ki kyntien kyntu kynpham bad jingkyrkhu kyrdoh ïa ka komiti bad ïa baroh ki referees kiba napoh jong ka South West Khasi Hills District.
Ha kajuh hi sngi, la ïoh ruh ka jingpynkup burom ïa ka samla Merrylyne Tongwah kaba dei ka National Referees ba nyngkong eh napoh jong ka South West Khasi Hills District, kumjuh ruh ka jingpynkup burom ïa u bah Ioannis Shangpliang, u bah M. Dapbor Jyrwa bad bah Overland Snaitang kiba long ki Senior Referees bad kiba la long ruh ki nongprat, nongbtin lynti ïa baroh ki referees hapoh jong ka distrik.
La pynphuh pynphieng ïa kane ka sngi ba kyrpang jong ki Referees la ïoh ban pynïalehkai kynjatbol ïa ki Referees pyrshah ïa ki nongkitkam jong ka Mawkyrwat District Sports Association (MDSA).
