Shillong, Nailur 01 : Ka North Liberty Higher Secondary School, Jowai hynne ka sngi ka la ïohrah ïa ka namlahduh hadien ba ka la lah ba pynliem ïa ka Om Roy HSS ha ka final da 5-4 lyngba ka jingïashut tie breaker hadien ba ki la ïakhaid da 0-0 ha ka jingïakhun ha madan ba 70 minit ha madanheh mini stadium, Mawlai Phudmuri.
Haba phai sha kane ka final ba la pynïalehkai kum shi bynta jong ka jingrakhe dap 25 snem jong ka Christ Church Morning School, Mawlai Syllaikariah ha ka kyllastep bad kyllamiet ym shym don kiba lah ban ïa thep kol bad kut ka jingïakhun da ka jingïakhaid da 0-0 bad ki nongpynïaid ki la pynshut tie breaker beit beit bad ka North Liberty HSS ka la ïohrah ïa ka Trophy bad ka OM Roy ka la wan baar.
Ha kane ka lympung ïakhun ki don baroh 11 tylli ki skul kiba la ïashim bynta. Ïa ka nam best Discipline Team la ïohrah da ka Mawlai Christian Secondary School, katba ka nam best Player ka la leit sha u Kevin Rymbai bad best Goalkeeper sha u Proficienty Ksih, baroh arngut ki dei na ka skul North Liberty.
Haba ai jingkren shuwa ban sam ïa ki khusnam u bah Teiborlang Pathaw, kum u kongsan u la pynpaw ïa ka jingkmen bad jingsngewtynnad ban don bynta ha kane ka jingrakhe ïa ka jingdap 25 snem ka skul.
U pynpaw ba kane ka skul ka la shakri bad ka la long ka jingkyrkhu bah ïa ka mawlai Konstitwensi.
Shuh shuh u ong ruh ki don bun ki skul mynsngi hynrei ki duna ki skul step hapoh Mawlai bad ka jingïohi jngai ki nongpynïaid ka la pynmyntoi ïa kibym ïoh leit skul mynsngi ba kin ïoh leit ïa kaba mynstep.
Ha ka juh ka por u la kitbok kitrwiang ïa ka skul ba ha ka jingïaid lynti ka jong ka U Blei un nangai bor ïa ki ba kin nanglah ban ai ka jinghikai kaba bha tam ïa ka thaiñ.
U la kren ruh halor ki jingmlien basniew kum u drok bad ka kiad, kumta haba pynlong kum kine ki jingïalehkai kan ïarap ïa ki ba kin lah ban lait bad kiar na kine.
Ïa ka khusnam sha kaba wan baar la sam u Bah Alexander Syiem, President ka Managing Committee, la sam ruh da u Bah Shemphang Basaiamoit bad kiwei kiwei.
Ha kane ka sngi ban pyniphuh iphieng ïa ka final ki khynnah jong kane ka skul ki la pyni ïa ka drill sha ki nongwanpeitkai.
