Rakhe ka PHE bad DSO East Khasi Hills ïa ka National Sports Day da ka jingïakop mareh ba 10 km

Shillong, Nailar 31: Ka Public Health Engineering (PHE) Department, jong ka Sorkar Meghalaya ha ka jingïatreilang bad ka District Sports Officer, East Khasi Hills, ka la pynlong ïa ka Jal Utsav 10K Run ha Golf Club Parking Lot, Golf Links, kum shi bynta ban rakhe ïa ka National Sports Day.
Kane ka jingïakop ka la long shi bynta jong ka jingrakhe ïa ka Rajya Jal Utsav kaba dang ïaid shakhmat hapoh ka phang “Celebrating Water, Securing Sources,” kaba la pynïasoh lang ïa ki samla pule, ki nongtrei sorkar, ki synjuk ïalehkai.
U Myntri ka tnad PHE ka jylla Meghalaya u Marcuise N. Marak u la wan ban ïashimbynta kum u Kongsan ha ka jingïadon lang u R.S. Nongbri, Chief Engineer ka tnad PHE, Meghalaya, bad u D.D. Umdor, Chief Engineer ka PHE, Environment & Sanitation, Meghalaya, Shillong.
Ha ka kyrdan ïakop jong ka Open 10K ki shynrang, ïa ka namjop la khur da u Daniel Wahlang, uba la pyndep hapoh 32 minit bad 19.07 sekon, bud sa u Angel Kumar Wahlang ha ka kyrdan ba ar (33:21.85), bad u Sharaidang Rymbathiang ha ka kyrdan ba lai (33:32.35).
Ha ka Open 10K jong ki kynthei, ka Mary Queen Pale ka la pyndep ha ka kyrdan ba nyngkong da kaba shimpor 44 minit bad 50.82 sekon ïa ka jingmareh, bud sa ka Ibashongkun Kurbah ha ka kyrdan ba ar (48:28.89), bad ka Beltina Pyngrope ha ka kyrdan ba lai (48:58.98).
La sam ruh ïa ki khusnam ba kyrpang sha ki nongïashim bynta kiba la rangbah tam, ha kaba u Pradap Das (42:42.67), Aloysius Rodney (43:09.28) bad Badon Singh Tham (43:10.00) ki la ïoh khur ha ka liang ki shynrang, katba ka Mena Mary Wahlang (51:38.39), Ibamei Shullai (57:38.22) bad ka Rojina Nongrum (1:05:28.66) ki la khur ha ka liang ki kynthei.