Nongpoh, Risaw, 07: Ka ophis u District Planning Officer, Ri-Bhoi District haka sngi thohdieng kala pynlong ïa ka jingrakhe ïaka Wildlife Week da kaba pynlong da ka Lecture Competition naka bynta ki khynnah skul ha Science Hall Nongpoh halor ka phang ‘Partnership for Wildlife Conservation’.
Na ka liang ki nongïashimbynta kila wan na kylleng ki skul jong ka thaiñ Nongpoh ban pynpaw pyrthei bad pyni ïaka sap ka phong kaba ki don, khamtam da ka jingthmu ban ïada bad ban pynneh pynsah ïaki mrad khlaw khamtam ki mrad bad ki jingthaw kiba la jan duh jait.
U Bah MB Tongper Additional Deputy Commissioner ka Ri-Bhoi District u la wan ban shim bynta kum u Kongsan ha kaba u ai ka jingïaroh ïaka jingshim bynta shitrhem jong ki khynnah skul bad khamtam u la ai khublei ruh ïaki nongïashimbynta kiba la khur ïaki khusnam bad nam jop ha katei ka sngi.
U la pynkynmaw ruh ba ka jingrakhe ïa katei ka Wildlife Week ka long kum ka jingkyrsiew thiah ïaki paidbah bad khamtam ban ai jinghikai halor ka jingdonkam ban sumar bad pynnneh pynsah ïaki mrad khlaw bad ki jingthaw ba im baroh.
La sam ruh ïaki khusnam ha katei ka sngi ha kaba ka Rihun Nongrum na Christian HSS bad ka Krimdaior Sangma na Nomiwell Memorial Secondary School kila ïoh ban khur ïaka nam ba nyngkong haka Junior Category katba haka Senior Category u Rahul Dkhar na Christian HSS bad ka Gadelia N Sungoh na Alpha English HSS kila khur ïaka nam ba nyngkong bad ba ar.
