Nongstoiñ, Risaw, 07: Ka jingshimkhia jong ki nongïalam niam ban seng ïa ki skul mission ym tang ha ki jaka sor hynrei haduh ki jaka ba kyndong tam, ka long ka jingmyntoi kaba khraw ïa ki paidbah nongshong shnong, khamtam ha kane ka juk ba baroh ki la sngewthuh ban ïabeh ïa ka pule dangle bad ban pynshlur ïa ki khun ki kti ban leit skul.
Ha kaba ïadei bad katei ka mat, ym lah ban len ba ki Phadar jong ki Katholik Mission ki dei kiba don shisha ka jingkitkhlieh ha ka ban kyntiew ïa ka pule puthi na ka bynta ki khynnah haduh ki jaka ba kham kyndong. Ha West Khasi Hills ka Pyndengrei Parish ka dei kawei ka Mssion kaba la aiti lut met bad mynsiem ban shakri ïa ki paidbah nongkyndong ha ka pule puthi da kaba tei ïa ki skul kiba bha bad kiba biang nadong shadong.
Kawei na ki skul kiba ka Pyndengrei Parish ka la tei, ka dei ka St Francis De Sales kaba don ha ka shnong Umwahlang, ka shnong kaba don ha rud ka surok Rwiang Langja. Naduh ba la sdang plie ïa katei ka skul ki khynnah na ki shnong kiba don ha katei ka thaiñ kata naduh Nonglang, Mawkapiah, Kyndongei, Langja, Umwahlang, Kyrdum, Mawsikar, Umbyrsit bad kiwei kiwei ki shnong, ki tuid ban leit pule sha katei ka skul wat la ki hap ban ïaid kjat da ki bun kilomitar.
Ki khynnah kiba dei na ki shnong ba kham jngai kum na Umbyrsit, Mawkapiah bad Langja ki hap ban ïaid kjat la kumno kumno shi kynta shiteng haduh ar kynta hynrei wat la katta ruh kim salia namar ba ki thrang ban leit skul.
Haba pyrshang ban kylli na ki rangbah bad ki nongpynïaid jong katei ka skul, ki la ong ba ha kaba sdang kim shym poi pyrkhat ba ki nongshong shnong katei ka thaiñ ki dei kiba la sngewthuh ïa ka jingkordor jong ka skul. Hynrei naduh ba la sdang ban plie ïa ka Upper Primary, ka jingwan rung skul jong ki khynnah ka la nang kiew man ka snem. Hadien katto katne snem la hap ban plie sa ia ka Secondary School ban haduh u snem ba la dep ka jingdon ki khynnah ha katei ka skul ka la kot sha ka phra spah ngut tam.
