Shillong, Jymmang 15 : Ka Nongthymmai Sports & Cultural Club ha ka 13 tarik Jymmang, 2023 ka la pynhap pyrda ïa ka jingrakhe ïa ka jingïaid lynti kaba 75 snem jong ka Club.
Shwa ban sdang ïa kane ka jingrakhe kaba la long ha madan Nongthymmai, ha ka por mynstep la plie paidbah ïa ka Fete da u Rangbah Shnong jong ka Dorbar Shnong Lumsohphoh u Bah N. Pakynteiñ bad ha ka por shiteng sngi la pynbud pat sa ka jingïakop rwai ba la pynïaid da u Cultural Secretary u Bah FA Dkhar.
Hadien kane, ka Club ka la pynkup burom ïa baroh ki rangbah shnong bad ïa ka kynhun ïalehkai Cricket kaba la ïoh rah ïa ka nam lahduh ha u snem 2019 ha ka First Division bad ïa ka kynhun ïalehkai Footbal kaba la poi ha ka kyrdan kaba ar ha ka First Division bad kynthup ïa ki nongïalehkai sports bad ïa ki nongkitkam jong ka Club.
Ha kane ka sngi, la sakhi lang da u MLA barim ka Nongthymmai u Dr. Jemino Mawthoh ryngkat ka jingsakhi lang jong u MDC u Bah Latiplang Kharkongor, u President jong ka Nongthymmai Sports and Cultural Club u Bah Bawan Khyriem, u General Secretary u Bah JC Cajee bad kiwei kiwei.
Ka Nadia Esalan Kharkongor na ka shnong Lawjynriew ka la long ka samla kaba la ïohrah ïa ka nam lahduh ha ka rynsan ïakop thei bhabriew kaba la tip kum ka Ms and Mr. Nongthymmai ba la pynlong da ka Nongthymmai Sports & Cultural Club kaba la pynhap pyrda ïa ka jingrakhe ïa ka lyngkhuh kaba 75 snem ha ka jingïaid lynti jong ka Club kaba la long ha ka 13 tarik u Jymmang, 2023.
Ha ka kyrdan kaba ar bad balai la ïoh rah da ka Adora Dejane Dkhar na ka shnong Lumsohphoh bad ka samla Phibannylla Majaw na ka shnong Nongkhyriem. Katba ha ka liang jong ki shynrang, u Samla Eddie Cruise Syiemiong na ka shnong Lumpyngngad u la ïohrah ïa ka nam lahduh katba ha ka kyrdan kaba ar ïoh rah da u samla Kordor Lang Thangkhiew na ka shnong Lumsohphoh bad ïa ka kyrdan kaba lai la ïoh rah da u samla Brilliant S. Thabah na ka shnong Lumsohphoh.
