MSL: Pynliem ka Mulait United FC ïa ka Youth Club Pdengkarong, ka Umrit ïa ka Seng Samla Laitryngew

Jowai, Jymmang 15 : Ka kynhun ïalehkai jong ka Mulait United FC kala lah ban pynliem da 2-1 kol ïa ka Youth Club Pdengkarong haka jingïakhun mynta ka sngi ha ka lympung ïalehkai phutbol ba la tip kum ka Meghalaya State League (MSL) 2023, Jowai Zone ha madan Kiang Nangbah Stadium Jowai.
Haba phai sha ka jingïakhun kala long kaba ïakhiat bha hapdeng kine ki ar kynhun kila la ïakhun dohïap katba lah ban thep ïa ki kol bad kane kala pynhun ïa kiba nongwan peit kai mynta ka sngi nyngkong.
Katba ka jingïakhun ka dang ïaid shakhmat na ka liang u rangïalehkai jong ka Youth Club Pdengkarong ula ïoh ban thep nyngkong ïa ka kol ha ka minit ba 28 lyngba u Wanbor Langshiang, hynrei na ka liang ka Mulait United FC kala ïakhun ban pynphai kylla ïa katei ka kol bad dei ha ka minit ba 32 u Bing Chyrmang ula thep ïa ka shikol bad la pynïakhaid ïa ka jingïakhun bad dei ha ka minit 52 jong ka kylla miet ka Mulait United FC kala ïoh biang ban thep ïa ka kol ba ar lyngba u Wantiewjune Buam.
Ka jingïakhun lashai ka sngi 16 tarik kan long hapdeng ka Rangdajied UTD FC pyrshah ïa ka Ladthadlaboh SC ha ka por 2 baje shiteng nohphai sngi.
Ha Shillong la sakhi ka jingïalehkai hapdeng ka Umrit bad ka Seng Samla Laitryngew, ha kaba ka jingïalehkai ka la kut da 3-1 sha ka jingjop jong ka Umrit, ha ka jingïalehkai kaba la long ha madan Third Ground ha Polo.
U Khimlang Thangkhiew u la ïoh ban thep kol nyngkong ha ka minit ïalehkai ba 26 minit. U Wanroyshang Sangma (45+2, 53) u la ïoh thep ar kol na ka bynta ka Umrit. Ka kol kaba nyngkong u la ïoh ban thep da kaba ïoh rah bol na ka liang kadiang jong ka dieng kol katba ka kol kaba ar u la ïoh ban thep da kaba suk.
Kaei kaba kham pynshohbiej ïa ki nongpeit kai kadei na ka jingbym pyndem jong ka Laitryngew watla ka la shah thep bun kol. Ki la ïakhun tyngeh naduh kaba sdang bad u Ferenstar Kharkongor udei u rangïalehkai ba hakhmat tam jong ka kynhun uba la jan ïoh ruh ban thep hat-rtict. Nyngkong ka jingpyrshang thep kol jong u la ïoh ban kyrdan noh da u rangïalehkai dien jong ka Umrit ha ka jingïalehkai ba la ïaid 61 minit.
Hynrei u la lah ban pynurlong ïa ka shi kol ha ka 68 minit jong ka jingïalehkai, bad ha ka minit ba 81 watla u la ïalehkai bha hynrei sniewbok ka bol ba u la khyrwit ka la lait noh salit ban rung shapoh kol.
Ha ka jingïalehkai ha Tura kaba dei na ka Group, baroh ar ki jingïakhun ki la kut noh da ki jingïakhaid da 1-1 kol. Ha kane ka sngi Nyngkong, ka pali mih madan ka la dei sa jong ka Selsella Sports Association bad ka Wasa FC kiba la ïakhaid noh ha ka jingïalehkai kaba la long ha Chandmari Ground. Ka Wasa FC ka la ïoh ban lamkhmat nyngkong ha ka minit ïalehkai ba 37 lyngba ka kol ba la thep da u Threebirth Momin bad ka Wasa ka la jan ïoh khur ïa ki lai point hynrei na ka liang ka Selsella ka la ïoh ban pynphai ha ka minit ïalehkai ba 86.
Ha Mawkyrwat, ka jingïalehkai na ka Group C, la sakh ba ka jingïalehkai ka la kut noh da ka jingïakhaid hapdeng ka Seven United SCC bad ka Lumdiengngan SC da 2-2 ha madan ïalehkai phutbol jong ka MDSA.
Khatduh ha katei ka sngi, ha Jowai, na ka Group B ka Mulait United ka la pynliem ïa ka Youth Club Pdengkarong da 2-1 ha ka jingïalehkai ha Kiang Nangbah Stadium.