Rakhe ka EJH ïa ka Swachhata Seva Campaign 2024 la plie paidbah ïa ka Waste Recovery Centre

Khliehriat, Nailur 25 : Kum shibynta ka jingrakhe ïa ka Swachhata Hi Seva Campaign 2024,ka District Swachh Bharat Mission (Gramin), East Jaintia Hills District ha ka 24 tarik Nailur ka la pynlong da ka prokram thung tynrai dieng bad jingpynshai paidbah halor ka ‘Waste Recovery’ ha ka jingialang ba la pynlong ha Latyrke Community Hall, Latyrke, EJHD.

Ha kane ka prokram la ia don lang ruh ka MLA ka Sutnga-Saipung ka Kong Santa Mary Shylla kum ka Kongsan, u Deputy Commissioner, EJHD u Shivansh Awasthi, Executive Engineer, Electrical Division, Jowai cum Member Secretary, District Swachh Bharat Mission (Gramin),EJHD Bah Paul Synnah, ki heh sorkar, ki nongialam shnong bad ki paidbah nongshong shnong.

Ha kane ka prokram ka Kongsan ka la plie paidbah ïa ka jaka lum ia ki tiar lyngkhot lyngkhai kiba lah ban pyndonkam biang (Waste Recovery Centre) ha ka Shnong Latyrke bad ïa ka kamram klas ba pynkha thymmai jong ka Latyrke Secondary School.

Haba kren ha ka jingialang ka Kongsan ka la ïaroh ïa ki nongshong shnong ka Latyrke halor ka jingiatreilang ka jong ki ban pynsuk ïa ka jingpyndonkam ïa ka pisa jong ka DMF fund bad ban pynlah ban pyndep ïa ki ar tylli ki projek ba la plie paidbah ha kane ka prokram kata, ka jingtei ïa ka Waste Recovery Centre bad ka kamram klas jong ka Latyrke Secondary School.Haba kren halor ka jingdonkam ban tehlakam ïa ka jingjaboh, ka Kong MLA ka la pynshai ruh halor ka jingkhluit jong ka pyrthei bad halor ka jingdonkam ban thung dieng bad ban shim khia ha ki jingpyrshang ban pynneh pynsah ïa ka mariang bad ban long ka nuksa kaba bha ïa ki pateng ban wan.

  Nalor kata ka Kong Santa ka la iai ban ruh  halor ka jingdonkam jong ka jingkhuid jingsuba ym tang ha la ki jong ki iing ki sem hynrei wat ha ka imlang sahlang ruh, kata da kaba kyntu ruh ia ki ban pynphriang ïa ka jingsngewthuh sha kiwei pat halor ka jingdonkam ia ka jingkhuid jingsuba bad ban tehlakam ia ki jaboh jabaiñ ha ka jingim kaba man ka sngi.

  Katba na ka liang u Deputy Commissioner ka EJH, u Shivansh Awasthi ha ka jingkren u la ai khublei ïa baroh ki nongshim bynta na ka bynta ban pyndep hok ïa kane ka Centre bad ha kajuh ka por u la pyntip ruh ba la plie paidbah ïa ka Swachhata Hi Seva ryngkat ka jingïohi jngai jong u Mahatma Gandhi ban pynlong ia kawei pa kawei ka shnong kaba khuid bad ruh ban kyntiew ia ka ioh ka kot ha ki thain nongkyndong.

Kiwei pat kiba la ai jingkren ha kane ka prokram ki kynthup ïa u District WASH (Water, Sanitation and Hygiene) Co-ordinator u Bah Embhah Rymbai, ka Patricia Law Co-ordinator ka Jal Shakti bad u  District Co-ordinator, District Swachh Bharat Mission (Gramin), EJH u Damonlangki Dkhar.