Kum u Acting Syiem ka Hima Langrin um don hok ban tuklar ïa ka kam Kur kiwei : ong ka SSHL

Mawkyrwat, ‘Nailur 25: Ha ka jingïalang paidbah ïa kaba la pynlong ha ka shnong Phlangdiloiñ, South West Khasi Hills District kawei na ki shnong hapoh ka Hima Langrin kaba dei ruh ka shnong kaba don bun u marpoh khyndew Uranium, u bah P.S. Lyngdoh kum u Lamphang jong ka Seng Samla Hima Langrin (SSHL) haba ai jingkren ula kren sngewdiaw bha namar ka jingdon jong utei u marpoh khyndew ha ka thaiñ bad u la pynpaw ruh ka jingbym sngewshngaiñ khamtam ba ki nongshynshar hima ki la ju shet shukor na kawei ka por sha kawei pat la kumba katto katne snem.

Shuh shuh haba bteng ïa ka jingkren, u la ong ruh ba ka jingdon jong u marpoh khyndew ne u Uranium ha ka thaiñ ka la pynlong mawjynthud shibun ïa ka roi ka par kat haduh ba ka la mih shibun ki kynrum kynram. Kumta u la kyntu ïa ki nongsynshar ba kin shimkhia ïa kane ka kam namar une u mar u la kylla long pynban kum u mrad kynsha bad u pynap jingma ïa ka thaiñ ïa ka Ri bad ka jaidbynriew hi baroh kawei.

Haba bynrap u la kynthoh ruh ïa u bah Brillian Hynri Syiemïong uba la bat kum u Syiem ba shipor ba um don hok ban tuklar ïa ka kam kur jong kiwei u la pynshong Nongrim ïa kitei ki kyntien namar ba une u Syiem ba shipor u la thung Lyngdoh, thung Myntri katba u mon khlem da mynjur lang jong ka kur.

Katei ka jingïalang ka dei ka jingïalang paidbah kaba ka seng ka thad madan ïa baroh ki kam barieh bad ba lehtuh, leh thok, lehshukor u Brillian Hynri Syiemïong u Syiem ba shipor ka hima hadien ba ka seng ka la lap lyngba ka RTI.

Ha katei ka sngi la ïadonlang ruh ka kong P. Mawlieh ka Pyndap phang jong ka Seng Samla Hima Langrin (SSHL) bad kiwei kiwei ki dkhot jong ka seng bad ki paidbah jong ka shnong Phlangdiloiñ kiba la wan ban shah shkor ïa ka jingpynshai paidbah jong ka Seng Samla Hima Langrin.