New Delhi Iaiong 26 : Ban burom bad rakhe ïa ka World Heritage Day kaba long ha ka 18 tarik Iaiong 2025 ka Manument Mitra Dalmia Bharat ka la pynlong ïa ka prokram ba kyrpang ha nongbah Delhi da kaba pynlong ka jingleit jngoh bad ïaid kjat ha Red Fort bad ka jingsakhi ïa ka jingpyni nam shaphang u Syiem Shah Jehan bad ka Mumtaz Mahal.
Hadien ka jingleit jngoh bad ïoh jingbatai na uwei na ki historian u la ïalam bad ïathuh shaphang ka Red Fort. Dei ha kum kane ka por ba nga kum uwei na kiba shah khot sngewbha nga la ïoh da shisha ban sakhi shaphang ka Red Fort bad ki jingtip bniah shaphang jongka. Kane ka jingleit jngoh ïa ka Red Fort ka long ruh ban tip bniah shaphang kiei kiei ki thymmei jongka. Kane ka prokram ba la pynlong da ka Manument Mitra Dalmia Bharat ka long ban nang pynkhlaiñ ban pynneh pynsah bad tip bniah shaphang ka kolshor jong kiba mynbarim bad kumno kita ki Syiem hyndai ki long kiba ieit bad tip shaphang ka jingtei nam ban pynsah kynmaw.
Ka prokram ka la sdang da ka jingïaid na kawei ka jaka sha kawei ka jaka hapoh ka Red Fort naduh ka khyrdop Lahori ha kaba la ïalam da uwei u nongbatai ne u historian u Anas Khan na ka Unzip Delhi. Ka jingïaïaid bad jingbatai ka long khamtam halor kito ki bynta kiba ym da ju kham tip bha shaphang ka Red Fort, ba kynthup naduh kiei kiei kiba don hapoh jongka. Ka jingbatai ka long naduh kaba tei ïa ka, kumno la ohdur ïa ka naduh ka por jongka jingsynshar ki Mughal. La batai kumno la tei bad pynwan dur ïa kane ka Fort da uwei u nongsaiñdur na Persia bad kumjuh ruh halor kata ka Hindu Shilpshastra da ka jingthmu ban pynwandur ïa kata ka Jannat lane ka paradais hangne ha pyrthei.
ïa ki nongwan jngohkai la pyni ruh ïa ki jingbuh jingem bad kumjuh ruh ka museum kaba don hapoh ka RedFort ban tip bniah shaphang jongka naduh ba sdang ban tei ïa ka. Hadien kane la leit ruh sha ka Red Fort Visitor Center ka jaka kaba la buh ïa kiei kiei ki jingohdur bad ohshrong naduh ka spah snem kaba 19 ba la wan hiarthma da ki Dohlieh bad la batai bniah bha shaphang kane ruh. Kane ka Museum ka pyni bad batai shaphang ka histori jongka Red Fort ryngkat ka jingdon ki dur ki dar. ïa ka janmiet la pynkut da kaba pyni ïa ki jingïathuh khana lyngba ki drama, ki jingrwai, ki jingpyni da ki bording bad khamtam ka jingpyni shaphang ka histori jongka Red Fort kaba la jer kyrteng ïa ka prokram kum ka Jai Hind Sound and Light Show. Ha kane ka prokram la pyni ïa ki puppet ba heh shaphang u Syiem Shahjahan ryngkat ka jingbatai jong u riewkhraw bad aktor ba pawnam u Amitabh Bachand. Kane ka prokram ka pyni kumno ka jingïaid lynti jongka India naduh ka jingsynshar jong ki Syiem Mughal haduh mynnne bad mynta bad ka la ai jingshai bad jingkmen ïa kiba wan jngohkai ban tip shaphang ka histori jongka ri naduh mynkulong kumah.
Ha kaba ïanoh synniang lang ïa ki jingmut jingpyrkhat halor kane ka prokram u Punnet Dalmia, MD bad CEO ka Dalmia Bharat Limited u la ong “ Kum kita ki Manument Mitra na ka bynta ka Red Fort, ka jingpyrshang jong ngi ka long shaphang kata ka prokram jong ka jingïohi jngai ban wanrah ne tei skhem ïa ka lariti jongka mynnor bad ka lariti kaba mynta bad dei na kata ka daw ngi kwah ban pynim ïa ka khana ne ka histori jongkane ka ri. Ka jingthmu ka long ban wanrah ïa ka jingtip bniah na ka bynta ki khun samla kaei kaba jia ha ki mynnor jongka ri kiba batai bad thaw kyrpang ïa kane ka ri kumba ka long haduh mynta. Ha kane ka juk kaba mynta ka India bad ki nongshong shnong jongka ki dang long kiba kyrpang nadong shadong. Kane ka jingïoh jingithuh ka pynpaw ïa ka dor bad ka jingjop jngngi ban dang ïai pynneh pynsah ïa ka kolshor jong ngi.Da ka jingïashim bynta lang jong bgaroh ngi kyrmen ba kum kine ki jingtei jong ki mynbarim kin dang ïai ïoh ka jingïada ban pynneh pynsah ïa ki ha sla jong kane ka pyrthei”.
Kum shibynta ban dang rah ïa ka nam bad ka burom jong ka Red Fort kum kata kawei na ki jingtei ba sahnam bad ba khring ïa ki nongwan jngoh kai pyrthei ka Manument Mitra Dalmia Bharat ka la pyrshang ban wanrah ïa ki prokram kum ka Red Fort visitor Centre bad ka prokram ba kyrpang kum ka Jai Hind. Ka thong jong ka Dalmia ka long ban pynneh pynsah ïa ka riti ka dustur bad ban pynïasnoh ïa ka mynnor ka mynta bad ka lashai.
Khyndiat shaphang ka Manument Mitra : Dalmia Bharat Limited
ïa ka Dalmia Bharat Limited la jied kum ka Manument Mitra na ka bynta ban shimti bad pynbha ïa ka ne ka jingtei sah nam bad jingkynmaw jongka Spah Snem kaba 17 ka Red Fort da ka tnad kam jngohkai jongka sorkar pdeng ha ryngkat ka jingïatrei lang bad ka Archaeological Survey of India (ASI). Kane ka long shi bynta na ka thong treikam jongka sorkar ban pynneh pynsah ïa ki jingtei mynbarim ne kata ka Heritage Project. ïa ka kompani la pynkupbor bad pynkhamti ban pynbit pynbiang ïa ki jingdonkam na ka bynta ki nongwan jngohkai sha ka Red Fort ban wanrah ïa kata ka jingsngewjan bad sngew paralok haba don hapoh ka Fort.
