Shillong, Ïaïong 26: Ka National People’s Party (NPP) ha ka jingïakynduh ba nyngkong jong ka National Committee kaba dei na ka bynta u snem 2025-2028 kaba la pynïaid da u National President u Conrad K Sangma ka la shim ïa ka rai ban pynrem jur ïa ki lehnoh kiba la siat ïap ïa ki riew paidbah ha Pahalgam ha Union Territory Jammu bad Kashmir.
Kum ka dak jong ka jingsngewlem ïa kito ki mynsiem kiba la khlad ha kane ka jingjia kaba sngewsih na ka liang ka party ka la pynlong ïa ka jingsngap jar kaba shi minit ban duwai na ka bynta jong kito ki mynsiem kiba la khlad bad ba kito kiba dang shitom kin ïoh noh ïa ka jingkoit jingkhiah.
Ha ka juh ka por na ka liang jong ka party ka kyntu ruh ïa baroh ban duwai lem na ka bynta ka jingshongsuk shongsaiñ ba kan wan biang ha katei ka jaka, kane ka long katkum ka kyrwoh kaba la phah da u James K Sangma Working President ka party.
