Shillong, Naiwieng, 02: U MLA jong ka United Democratic Party (UDP) u Bah Eugeneson Lyngdoh ha ka sngi Balang u la pynbna ba un ym ïakhun shuh ïa ka elekshon sha ka Iingdorbar Thawaiñ ka Jylla ka ban sa long ha u snem 2023.
U Bah Eugeneson u la jop ïa ka Elekshon shiteng samoi ha u snem 2021 hadien ka jingkhladnoh jong u kpa jong u, u Bah Syntar Klas Sun.
U la ong ba ka jingiehnoh jong u ïa ka jylli jong ka saiñpyrthei ka dei na ka daw shimet jong u.
Ha ka jingïakren bad u nongthoh khubor hadien ba la wai ka jingïalang ba la pynthymmai ïa ka shnat treikam jong ka UDP ha Mawphlang Constituency u Bah Eugeneson Lyngdoh u la ong, “nga ladep pynshai hakhmat ki nongïalam ba ngam kwah shuh ban dang ïakhun ïa ka Elekshon. Ka dei hi na ka daw jong nga shi met bad kam don ruh da kawei pat ka daw.”
Haba kylli, ïano ka UDP Mawphlang Circle kan sei ïa u kyrtong u ban mih bujli ha ka jaka jong u, u Bah Eugeneson u la ong, “ka Circle hi kan sa pyrshang ban buddien ïa ki aplikeshon ban sa wan nangne shakhmat bad kiba kwah ban ïakhun na ka tiket jong ka UDP.”
U la ong ruh ba ka shong ha ka jingpyrkhat jong ki nongïalam kumno ban sei da uwei pat u ban mih bujli ha ka jaka jong u namarba na lade hi um don mon shuh ban dang ïai bteng ban don ha ka jylli jong ka saiñ pyrthei.
“Ka rai kaba nga la shim ka long kaba bha na ka bynta ka party bad ïa mynta ngan hap ban pyrkhat bha ïa la ka jong ka lawei kaei kaba dei ban leh bad kumno ban ïaid nangne shakhmat,” u la ong.
Haba kylli, hato un dang ïai trei neem na ka bynta ban pynkhlaiñ ïa ka UDP bad ban kyrshan pura ïa u kyrtong jong ka UDP u Bah Eugeneson u la ong, “nga dang dei u dkhot jong ka party bad ngan ïai trei shitom ruh na ka bynta ka party.”
