Rai pynrem ka Kashari West Garo Hills da kaba set along ïa lai ngut ki runar leh be-ijot

Shillong, Naiwieng, 02: Ki Pulit jong ka Tura Women Police Station ha ka 2 tarik Jyllliew, 2017 ki la ïoh jingtip ba uwei u briew uba la tip kyrteng kum u Nenggrik D Sangma u la leh be-ijot ïa kawei ka khynnah skul katba ka dang wan na skul ban leit phai sha la iing.
Tang shu ïoh jingtip, ki Pulit ki la register case ha Tura Women PS da kaba pyngngat hapoh ka Section 366/368/376 jong ka Indian Penal Code (IPC) bad ïa ka jingtohkit la bynshet ha ka Sub-Inspector Salmay R. Marak. Hadien ba la pynlong ïa ka jingtohkit ïa ka jingpynngat kyndon la aiti ha ka 1 tarik, Jymmang, 2018.
Hadien ba ladep ka jingtian bishar, u District and Session Judge jong ka West Garo Hills, Tura u la lap ba une uba la shah kynnoh ïa uba la tip kyrteng kum u Nenggrik D Sangma u donkti ha kane ka kam runar bad pyngngat ïa u hapoh ka Section 368/376 (i) IPC.
Ka Kashari ka la pynshitom ïa une u runar da kaba rai ban set along saw snem bad daiñ kuna T. 20,000 hajar hapoh ka Section 368 IPC bad hynñiew snem ka jingshah set along bad ka jingshah daiñ kuna kaba T.50,000 hajar hapoh ka Section 376 (i) IPC. Lada um lah ban siew ïa ka kuna, un hap ban bteng ïa ka jingshah set along sa lai bnai kynthih.”
Ha kawei ka jingjia, ki Pulit jong ka Tura Women PS ha ka 19 tarik, Rymphang, 2016 ki la ïoh pdiang ïa ka ujor ba uwei u briew uba la tip kyrteng kum u Lukias G. Momin u jrong kti ïa kawei ka khynnah rit ha ka 18 tarik, Rymphang, 2016.
Ki Pulit ki la register case halor kane ka jingjia ha Tura Women PS hapoh ka Section 11(i)/12 jong ka POCSO Act bad ïa ka jingtohkit la pynkhamti ha ka Sub-Inspector G.T. Sangma. Hadien ba la pyndep ïa ka jingtohkit, ïa ka jingpyngngat kyndon la aiti ha ka 26 tarik, Naitung, 2016.
Hadien ka jingpyndep ïa ka jingtian bishar, u Special Judge (POCSO), ka West Garo Hills ula lap ba une uba la shah kynnoh ïa uba la tip kyrteng kum u Lukias G. Momin u donkti ha ka kam runar bad pynngat ïa u ha ka Section 71 jong ka Indian Penal Code (IPC) bad ha ka Section 42 jong ka POCSO Act 2012. Katkum ka rai, ka Kashari pynshitom ïa une u runar da kaba set along hynriew bnai bad daiñ kuna T. 60,000 hajar.
Lada une u runar um lah ban siew ïa ka kuna, un hap ban bteng ïa ka jingshah set along sa hynriew bnai kynthih halor ka jingjrong kti ïa ka lanot.
Ha kawei pat ka jingjia, ki Pulit jong ka Tura Women PS ha ka 22 tarik, Jymmang, 2016, ki la ïoh pdiang ïa ka ujor ba uwei u briew uba la tip kyrteng kum u Arindom Das u la jrong kti ïa kawei ka khynnah rit ha ka 16 tarik, Jymmang, 2016.
Ki Pulit ki la register case ha Tura Women PS hapoh ka Section 7/8 jong ka POCSO Act bad ïa ka jingtohkit la bynshet ha ka Sub Inspector Renu D. Momin. Hadien ba la pyndep ïa ka jingtohkit, la aiti ïa ka jingpynngat kyndon ha ka 29 tarik, Naiwieng, 2016.
Hadien ba la kut ka jingtian bishar, ka Kashari jong u Special Judge (POCSO), West Garo Hills, ka la lap ba u Arindom Das u la leh bakla bad rai pynrem ïa u hapoh ka Section 8 R/W Section 18 jong ka POCSO Act 2012.
Ka Kashari ka la pynshitom ïa une u runar da kaba set along shi snem shiteng bad daiñ kuna T.20,000 hajar. Lada um lah ban siew ïa ka kuna, un hap ban bteng ïa ka jingshong along sa hynriew bnai kynthih.