Shillong, Risaw, 30: Ka Meghalaya Asha Workers Unions (MAWU) ka la rai ban sangeh treikam da kaba shong sngi ha ing naduh mynta ka Lah Sngi u Blei tad haduh ka 6 tarik, Naiwieng hadien ba ka Myntri ka Koit ka Khiah jong ka Sorkar Jylla ka Dr. Ampareen Lyngdoh ka la rai ban rah ïa ki mat jingdawa jong ki ASHA hakhmat u Myntri Rangbah ka Jylla u Conrad Kongkal Sangma.
“Naduh mynta ka sngi, ki ASHA kin shongthait shwa (na ka kam ba ki trei) ban ap haduh ka 6 tarik, Naiwieng. Lada ngim ïoh ïa ka jubab ha ka 6 tarik lane 7 tarik, Naiwieng, ngim banse ban ïaid noh shakhmat da kaba shong ha surok ha ap ïa ka jubab haduh ba kan da pynhun ïa ka jingpynsngew jong ki ASHA,” la ong ka President jong ka MAWU ka Kong Mira June Myrsing ha ka jingïakren bad ki lad pathai khubor.
Shwa kane, ka nongaibuit jong ka MAWU ka Kong Soni Kharjana ka la ïathuh ba ka jingïakynduh ïa ka Myntri ka Koit ka Khiah ka long halor ka jingdawa ban kyntiew ïa ka jingsiew bainong ïa ki ASHA.
“Ka Myntri ka Koit ka Khiah ka la pyntip ba ka la buh sngi ban sa ïakynduh ïa u Myntri Rangbah ha ka Lah Sngi u Blei jong ka taiew ban sa wan ban ïathir ïatai halor ka jingdawa ki ASHA ban kyntiew ïa ka jingsiew bainong,” ka la ong bad ïathuh ba ka Dr. Ampareen ka la pyntip ba ha ka jingïalang ka ban sa long, yn sa ïadonlang u Principal Secretary jong ka tnat ka Koit ka Khiah bad u Mission Director jong ka National Health Mission (NHM) u Ram Kumar.
“Hynrei kam pat ai ïa ka jingkular hynrei ka shu ong ban sa shong jingïalang bad u Myntri Rangbah,” la bynrap ka Kong Kharjana.
Kawei pat ka mat kaba ar, kaba ka MAWU ka la dawa ïa ka Sorkar Jylla ka long, lada ki ASHA ki shah sumar ha kino kino ki Hopsital ka Sorkar hi ka dei ban bei ïa ka jinglut jingsep lyngba ka MHIS kaba long shispah na ka shispah.
Ka la ïathuh ba ka Myntri ka la bthah ïa ki ASHA ban pynpoi ïa ki jingtip kiba bniah jong ki ASHA ha baroh kawei ka jylla khnang ba yn dup lah ban pynrung kyrteng ban shah kynthup ha ka MHIS. “Ka Myntri ka la kular ba ki ASHA (lait noh ki bahaing bahasem) kim donkam ban siew pisa wat shi naïa ruh lada ki thiah Hospital,” ka la ong
Ki nongïalam ka MAWU ki la pan jingpynshai ruh na ka Myntri ka Koit ka Khiah ha kaba ïadei bad ka jingshah wengkam khlem nongrim jong ki ASHA.
“Ha kaba ïadei bad kane, ngi la pyrshang ban pan da ka aiñ, hynrei ka Myntri ka la ong ba kan sa ai da ka Guideline kaba thymmai ïa kaba yn sa phah sha baroh ki Deputy Commissioner bad sha ki Rangbah Shnong,” ka la ong.
Ka la ïathuh ruh ba kum ka kynhun ki la ujor hakhmat ka Myntri ka Koit ka Khiah halor ka jingpan jong kiwei ki tnat treikam jong ka Sorkar ïa ki jingtip kiba bniah ba ki ladep leh sorjamin ha ki shnong ba ki trei.
“Haba ki ASHA ki ladep pynbiang ïa ki jingleh sorjamin lajong, kiwei pat ki tnat treikam ki pan na ki ASHA. Ha ka jingshisha kiwei kiwei ki tnat treikam haba ki leit ban sorjamin ki ïoh ïa ki jingsiew hynrei haba ki ASHA kim ai ki ujor pynban sha ki Rangbah Shnong. Ka ASHA ka da pynshitom ïalade ban rung ha manla ki thliew iing ban ïoh ïa ki jingtip kiba bniah katba kiwei pat ki tnat treikam ki shu wan pan da kaba suk. Na ka liang jong ki tnat Sorkar ki la ai da ka jingpynshai kaba biang ba kim lah ban pan ïa ki jinglum jingtip ba ki ASHA ki leh,” la ïathuh ka Kong Kharjana.
“Ka Myntri ka Koit ka Khiah ka la ai da ka Guideline kaba biang kaba bthah ïa ki Rangbah Shnong ba ki dei ban sngewthuh halor kane bad kim (ASHA) lah ban shu ïasam kumto ïa ki jinglum jingtip ba ki la trei shitom namarba ki hap ban pynlut ïa ka por bad ka sngi. Lada ki (tnat sorkar) donkam eiei na ki ASHA hi, ki hap ban siew da ka dor.”
