Shillong, Jymmang, 21: Ka Sorkar Jylla ka la rai ban pynïar shuh shuh ïa ka jingkit dawai da ki Drone na ka bynta ban pynpoi ïa ki dawai dashin sha ki 25 tylli ki shnong kiba kham jynjar ha ka leit ka wan.
“Ki don 11 tylli ki jaka ba kham sohsat ka leit ka wan ïa kiba la pynkit ïa ki dawai dashin da ki Drone ha ka jylla Meghalaya bad ha shwa jong u bnai Nailur-Risaw, ngi khmihlynti ban nang kyntiew shuh shuh ïa ka jingai jingshakri sha ki 25 tylli ki jaka,” ong ka Myntri ka Koit ka Khiah ka Dr. Ampareen Lyngdoh.
Ki jaka ai jingsumar ba la pyndonkam ban kit dawai da ki drone ki long ka Pedaldoba PHC, Mendipathar PHC, Nongalbibra PHC, Samanda PHC, Shallang PHC, Asanang PHC, Dadenggre CHC, Gabil PHC, Manikganj PHC, Sualmeri PHC bad ka Songsak PHC.
Ïa ki drone la pynher na Jengjal Sub-Divisional Hospital, West Garo Hills District.
Ka jingpynkit dawai da ki drone ka la sdang naduh u bnai Nohprah, jong u snem ba ladep bad haduh mynta la lah ban pyndep haduh 154 spah sien ka jingkit dawai ha ka jingjngai kaba 5734 hajar kilomitar.
Ka Dr. Ampareen ka la ong ba kane ka jingai jingshakri da ka Sorkar Meghalaya ka long ban pynthikna ba ki dawai dashin kin poi sha ki jaka kiba jngai bad kiba kham sohsat ban ïaid na surok.
“Ha Meghalaya mynta ngi don ïa ka jaka pynher drone kaba pura ha Jengjal bad ka jingpynkit ïa ki dawai dashin ha ki drone ka long san kilo ban phah sha ki CHC/PHC kiba kham suhsat ka leit ka wan,” ka la ong.
Ka Myntri ka la ïathuh shuh ba ha u bnai Nailur-Risaw, ïa ki drone yn sa pynkit ruh ïa ki tiar kiba khia haduh 25 kilo.
“Ym tang ba ngi pynkit ïa ki dawai dashin hynrei ngi pynkit ruh ïa ki jingleh Test. Namarkata, lada don kino kino ki nongpang kiba donkam ban leh test, ban shim snam bad kiwei kiwei yn pynkit lyngba ka drone khnang ba ki paidbah kin ïoh jingmyntoi khamtam na ka jingsniew ka surok,” ka la ong.
Haba pynpaw ba ka Sorkar kan pynthkna ba kane ka jingtreikam kan tyllun beit shakhmat, ka Dr. Ampareen ka la ong, “namarba ngi kwah ban pynïar shuh shuh ïa ka jingpynkit dawai sha ki jaka kiba jngai. Kumjuh ruh, haba phi pynkit ïa ki dawai lyngba ki drone phi kham duna ruh ka jingpynlut pynsep haba kaba kit ïa ki dawai dashin da ki kali sha ki jaka kiba kham jynjar ka leit ka wan.”
Ka Dr. Ampareen kaba peit ruh ïa ka tnat Agriculture & Farmers’ Wefare, ka la pyntip ba ka Sorkar ka la thmu ban ai jingshakri kumjuh ha kaba ïadei bad ka jingpynkit ïa ki mar rep.
“Lada ïa kane la lah ban pyntreikam ha ka tnat ka Koit ka Khiah, ngi lah ruh ban pyntreikam ha kaba kit ïa ki mar rep. Namarkata ngi dang pynïar ïa kane ka jingai jingshakri,” ka la ong.
Shuh shuh ka la ïathuh ba kane ka jingshakri lyngba ka Drone ka long kaba kongsan bha na ka bynta ka Sorkar. “Ha ki jylla ba kham suhsat ka leit ka wan kum ha Meghalaya, ngi hap ban don da kiwei pat ki lad. Kan long ruh kaba bha tam ha ki por ban sa wan ban pyntreikam haba jia ka jingshlei um, ka jingtwa khyndew ha ka jylla. Kine ki jingjia lynshop mariang ki dei kiba ju jia khah khah, bad lada kane kan treikam ngin sa dei ka jylla kaba nyngkong eh ban pyntreikam lyngba ki drone,” ka la bynrap.
Katkum ka jingong jong ka Myntri, ka Sorkar ka la pyrshang ban pynïar ïa ka jingshakri lyngba ki drone, ïa kaba la pynïaid da kawei ka Agency ba la tip kum ka Tech Eagle.
