Rai ka Sorkar ban phah tohkit biang ïa ka jingshngaiñ ka jingkieng ha Umïam

0

Shillong, Lber, 21: Ka Sorkar Jylla ka la rai ban phah tohkit biang ïa ka jingshngaiñ jong ka jingkieng halor ka Pung Umïam.
Ïa kane la pyntip da u Myntri Rangbah ka Jylla u Conrad K. Sangma haba jubab ïa ka jingïatai nia halor ka jingkren lamphrang jong u Lat ka Jylla hapoh ka Iingdorbar Thawaiñ ka Jylla ha ka sngi Baar.
U Sangma u la ong ba ha u snem baladep ladep ban pynlong ïa ka jingtohkit bad la lap ba ka jingkhynñiuh (na ka jingïaid ki kali) kam pat lei lei than.
“Hynrei, ngin sa pynlong biang sa shisien ïa ka jingtohkit ban pynthikna ïa kine ki jingsngew (ba la pynsngew da ki dkhot)” u la ong.
U Myntri Rangbah u la kubur ba watla ka don tang shi persen ruh ka jingman ka lah ban pynsngewkhia ïa kiba bun namarba kane ka jingkieng ka dei u budlum jong ka jylla bad kiwei kiwei ki bynta jong ka thaiñ Shatei Lammihngi.
Ha u bnai Jymmang, jong u snem baladep, ka Iingbishar Meghalaya High Court ka la bthah ïa ka Sorkar Jylla ban khang ïa ki kali kiba kit palat 10 metric ton ban ïaid lyngba na kane ka jingkieng ha Pung Umïam hadien ba la ai jingmut ba ka jingkieng kaba mynta kan ym lah ban shan slem lada kit khia shaba palat ki kali.
Ka Iingbishar ka la ong ba ka National Highways Authority of India (NHAI) bad ka Border Roads Organisation (BRO) ki la mynjur ba ka jingkieng ha pung Umïam dei ban shna bujli da kawei kaba lah ban shan slem na ka jingïaid ki kali manla ka sngi.
Ka BRO ka la kdew ruh ha ka jubab affidavit ba ki kali kiba kit palat 10 metric ton ym dei satia ban ailad ba kin ïaid lyngba na ka jingkieng.

Leave A Reply

Your email address will not be published.