Shillong, Lber 21 : U Myntri Rangbah ka Jylla Conrad K Sangma mynta ka sngi ba-ar, ula kular ba ka sorkar jylla kan sa shong bishar ïa ka kam ba ïadei bad ka jingdawa thungkam pura (regularize) ïa ki nonghikai ha ki skul Lower Primary ki bym dei jong ka sorkar.
“Ngin sa shong bishar ïa ka kam khnang ba ngin lah ban shim ïa ka sienjam kaba dei” ong u Conrad hapoh ka Iingdorbar Thaw Aiñ.
U Conrad ula ong ba ka Sorkar Meghalaya Democratic Alliance-I, kala lah ban pynbeit ïa kane ka kam, kaba la sahteng la 30 snem, da kaba thungkam pura ïa palat 461 ngut ki nonghikai jong ki skul Lower Primary ki bym pynïaid da ka sorkar. Kine ki nonghikai ki dei kiba la thungkam da ki Administrator/ Deputy Inspector of School shuwa u 2007.
Shuwa ïa kane, u Myntri ka Tnad Pule Puthi u Rakkam A Sangma ula pyntip ba 1985 ngut ki Nonghikai jong ki skul Lower Primary ka Sorkar la dep ban thungkam pura.
Haba u MLA ka UDP na Nongpoh u Bah Mayralborn Syiem u kwah ban tip ïa ka lawei jong ki nonghikai ha ki skul Lower Primary bym dei jong ka sorkar kiba la shah ieh shadien, u Rakkam ula ong ba um don satia ïa ka jingtip hynrei ïa kane ka mat ba la kdew, ula buh jingthoh bad un sa shong bishar ïa ka.
U Bah Mayral ula kyntu ïa u Myntri ban khmih ïa kane ka kam kaba ïadei bad kine ki Nonghikai.
