Rai ka RC ban aiti ïa ki kyrteng shnong ba kwah neh ha Meghalaya ha ka Sorkar Assam

Shillong, Nailar, 08: Ka Regional Committee na ka bynta ka West Khasi Hills ka la rai ban phah ïa ka thup kyrteng jong ki shnong, ba ki paidbah nongshong shnong ki angnud ban don ha Meghalaya, sha ka Regional Committee ka Jylla Assam.
Ïa kane la pyntip da u Chairman jong ka Regional Committee u Bah Paul Lyngdoh uba long ruh u Myntri ka Sorkar Jylla hadien ba la wai ka jingïalang jong ki ar tylli ki Regional Committe ba la long ha Guwahati ba la ïashim bynta lang da u Chairman ka Regional Committee na ka bynta ka Kamrup District u Chandramohan Patowary uba long ruh u Myntri ka tnat Forest ka Sorkar Assam.
Ïa ka jingïalang la pynlong hadien ba ka Sorkar Meghalaya bad ka Sorkar Assam ki la pynsdang ïa ka jingïakren pynbeit pud ha ka wat kaba ar ban ïapynbeit noh ïa ki hynriew tylli ki jaka ba don ka jingïakajia pud hapdeng kine ki ar tylli ki jylla.
Ïa u Bah Paul Lyngdoh la synran lang da ki MLA ba kynthup ïa u Bah Renikton L. Tongkhar, u Bah Methodius Dkhar bad u Remington G. Momin, ki MDC ba kynthup ïa u Bah Bajop Pyngrope bad u Bah Gigur Myrthong, u Deputy Commissioner bad u Superintendent of Police bad ADM ka West Khasi Hills katba ïa u Patowary la synran lang da ki heh Ophisar jong ka Sorkar Assam ba kynthu ïa u DC bad ïa u SP jong ka Kamrup District bad ki ophisar na ka tnat Forest.
Ha u kyrwoh ba la phah lyngba ka Video, u Bah Paul Lyngdoh u la ïathuh ba ka jingïakren ka long kaba seisoh bad ka don ruh ka jingïasngewthuh jingmut.
“Ngi la ïakren beit thik tang ïa ki katto katne ki bynta kiba ka Committee ka dei ban leh. Nyngkong eh, halor ka jingkam jong ka Committee kaba nga la ïalam na Meghalaya, ka Sorkar Assam ka la pdiang sngewbha ïa ka jingai jingmut ba ngin phah ïa ka thup kyrteng jong ki shnong ki bym don kano kano ka jingïakynad ha kaba ki paidbah jong kine ki shnong ki angnud ban ïaineh ha Meghalaya kiba la pynrung ïa ka kyrteng thep vote sha Meghalaya bad ïa kiba ka Sorkar Meghalaya ka la theh ïa ki song pynroi da ki phew phew snem,” la ïathuh u Bah Paul.
“Ngi la ïakren ruh ban ïohi ba kine ki jaka kin wan phai biang sha ka Jylla Meghalaya bad ïa kane ngin pynthikna bad nga kular ruh sha ki paidbah jong ka Jylla lyngba ka jingïakren bad ka Sorkar Assam ngin sa lah ban weng noh ïa kine ki jingeh kham kloi katba lah,” la bynrap u Bah Paul.
U Bah Paul u la bynrap ruh ba ki Regional Committee jong ki ar tylli ki jylla ki la ïamynjur ba ki katto katne ki jaka kiba don hapdeng ka jingïakajia yn sa ïapynbeit da ka jingïasngewthuh jingmut bad halor kane, ka Committee kan sa shong ruh ïa ka jingïalang ha Shillong hadien ka 15 tarik mynta u bnai.
“Hadien, ba la ïathir sani halor kine ki ar tylli ki mat, ki ar tylli ki Regional Committee kin sa leit sorjamin ïa ka Langpih Sector bad ban ïakynruh ïa ki kynhun bapher bapher ba kynthup ïa ki nongmihkhmat, ki rangbah shnong bad ïa ki paidbah nongshong shnong,” u la ong bad pynpaw ruh ïa ki jingeh jong ka Langpih Sector yn sa lah ban weng noh shen.