Markhmat bad u Modi leit dawa ILP biang u Conrad bad ka kynhun ha nongbah Delhi
ïathuh ba ka jingkren ïasuk bad ka HNLC ka la ïaid shakhmat
Shillong, Nailar 08 : U Myntri Rangbah ka Jylla, Conrad K Sangma ryngkat ki Myntri Sorkar kumjuh u Lamphang ka Iing Dorbar Thawaiñ ka jylla hynne ka sngi ki la kynduh markhmat ïa u Myntri Rangbahduh ka Ri, u Narendra Modi ha nongbah New Delhi pynkynmaw biang ïa ka ishu Inner Line Permit nalor kiba bun kiwei pat ki mad jingdawa.
Ha katei ka jingïakynduh, ka kynhun ka la aiti ruh ïa ka dorkhas ha u Modi ban kyrpad ba un tuklar lang na bynta kiba bun ki jingeh bad jingdonkam kiba ïadei bad ka Meghalaya. Haba ïadei bad ka Inner Line Permit, ka kynhun ka la pynpaw ruh ba naduh u snem 2019 ba ki mynjur da ka Resolution ha Iing Dorbar, haduh mynta ka sorkar jylla ka dang ap sah ïa ka jingmynjur na ka tnad Kampohiing ka Ri.
Kawei pat ka mat kadei halor ka jingdawa ban ai jingithuh noh ïa ka Ktien Khasi bad Garo ha ka Khyrnit kaba Phra. Haba ïadei bad kane ka bynta, u Myntri Rangbah u la pynpaw ba ka Iing Dorbar naduh u snem 2018 ka la mynjur da ka Resolution bad katei ka mat ruh ka dang sahkut sah bad ka sorkar India.
Na ka liang u Myntri Rangbah u la pan ruh ka jingkyrshan na u Myntri Rangbahduh ka Ri haba ïadei bad ka jingkren pynbeit pud kaba dang ïaid mynta sha khmat ha ki 6 tylli ki jaka kajia pud bad ka Assam. Lah ruh ban kdew hangne ba hynriew tylli la dep ban ïa pynbeit ha u Lber 2022 hadien ba ka sorkar Meghalaya bad sorkar Assam ki la dep ban soi ïa ka soskular pynbeit pud hakhmat u Myntri Kampohiing ka Ri u Amit Shah. Kumba long mynta ka jingsorbe lang da baroh arliang ka dang ïaid shakhmat ha baroh ar tylli ki jylla ban pynbeit noh ïa u pud u sam.
Ka kynhun ki Myntri Sorkar ba kynduh ïa u Modi hynne ka sngi ki kynthup ruh ïa ki arngut ki Symbud Myntri Rangbah kata u Bah Prestone Tynsong bad ruh u Bah Sniawbhalang Dhar, nangta u Bah AL Hek, Kong AmpareenLyngdoh, Bah Kyrmen Shylla, Marcuise N Marak, AT Mondal bad kiwei kiwei.
Ha kajuh ka por u Myntri Rangbah u la pyntip ruh ha u Myntri Rangbah ba ka jingïakren ïa suk bad ka kynhun kiengatiar jongka HNLC ka la ïaid mynta shakhmat bad na ka liang ka sorkar jylla ka don ka jingkyrmen ba katei ka jingïakren ïa suk kan long kaba seisoh.