Shillong, Nailur, 03: Ka North Eastern Hill University Teachers’ Association (NEHUTA) ka la rai ban mudui sha ka President jong ka ri India ka Droupadi Murmu pyrshah ïa ka jingkheiñ ïa ka NEHU Act, Statutes and Ordinances da u Vice Chancellor jong ka skulbah North Eastern Hill Univeristy (NEHU) u Prof.PS Shukla ha kaba ïadei bad ka jingpyntreikam ïa ka National Education Policy (NEP).
Kane ka jingshim rai ka long hadien ba la kut ka jingai por da ka Association ïa u Vice Chancellor ka NEHU ban weng noh ïa ka jingpynbna (Notification) kaba la pynmih ha ka 12 tarik, Naitung mynta u snem ba la phah sha ki Principals jong ki College ba la pynïasnoh bad ka NEHU da u Officer on Special Duty (OSD), CDC, NEHU u Debasish Chowdhury ïa kaba la kynnoh ba ka dei kaba la shu ïalam bakla bad ka bym ïahap satia.
Ha u kyrwoh, u President ka NEHUTA u Prof. Lakhon Kma u la ong, ha ka jingïalang ba kyrkieh jong ka Executive Committee ka NEHUTA kaba la long ha ka 31 tarik, Nailar, 2023 ka la rai ban pyntreikam ïa ka sur ba la shim rai da ka General Body Meeting kaba la long ha ka 26 tarik, Nailar, 2023.
“(Ngi la rai) ban phah ïa ka kaiphod kaba bniah halor ka jingpynkheiñ ïa ka NEHU Act, ka Statutes and Ordinances da u Vice Chancellor sha ka The Visitor jong ka University, ka President badonburom jong ka ri India, sha ka Ophis jong u Myntri Rangbahduh ka ri, sha u Union Minister ka tnat Education u Dharmendra Pradhan, sha ka Union Finance Minister ka Nirmala Sitharaman, bad sha kiwei kiwei ki Myntri ka Sorkar Pdeng, sha u Chief Rector jong ka University-uba dei u Lat ka Jylla Meghalaya bad sha u Myntri Rangbah ka Jylla,” ong u Prof. Kma.
U la ong ba ka Association ka la rai ruh ban ym leit ïashim bynta shuh ha ki jingïalang jong ka Academic Council (AC) ki ban sa long hadien habud.
“Haduh mynta, baroh ki dkhot jong ka NEHUTA ki la kiar ban set ne ban shna pynthymmai ïa ki Qs papers jong ka Ist semester hapoh ka NEP bym shongaiñ ba la pyntreikam ha ka UG level na ka bynta ki sobjek bapher bapher kumba la rai da ka GBM jong ka NEHUTA,” u la bynrap.
Shuh shuh, u Prof. Kma u la ong ba ka Academic Council kam pat shim rai eiei halor ki model Qs papers hapoh ka NEP na ka bynta ki Under Graduate kiba donkam katkum ka NEHU Ordinance khnang ba kan don ka jingïaryntih ha kaba pynbeit ïa ki Qs paper na ka bynta baroh ki sobjek.
“Na ka jingbym don ki model Qs papers, ki nonghikai kim lah satia ban set jingkylli. Khlem kine ki kyndon, ki eksamin Under Graduate na ka bynta ki 1st Semester katkum ka NEP yn ym lah satia ban pynlong,” u la ong.
Shuh shuh, u Prof. Kma u la ong ba ka NEHUTA ka sngewkhia bha ïa ka jingleh khun jakai ka NEHU ïa ka lawei pule jong ki samla pule Under Graduate da kaba shu rai kyrkieh ban pyntreikam ïa ka NEP khlem shongaiñ bad khlem ka jingmynjur jong ka Academic Council., haba ym pat lah ban pynkhreh lane kloi ban pyntreikam ïa ka NEP khlem da ïasyllok kumno ban leh halor ki model Qs papers ha ka AC, ki syllabus na ka bynta baroh ki sobjek naduh ka 3rd haduh 8th Semester ïa kaba dei ban pynkhreh, ban ïasyllok bad ban mynjur da ka Board of Studies jong ki Departments bapher bapher jong ki School Boards bad khatduh eh ban ïasyllok bad ban mynjur pat da ka Academi Council.
“Ka dei ka lynti kaba jrong bad na kata ka daw u VC um lah ban shu pyntreikam kyrkieh ïa ka NEP bad khlem da pynshong nongrim bha. Kine baroh ki dei kiba donkam katkum ka NEHU Statute and Ordinance kaba donkam ruh ïa ka jingmynjur jong ka Academic Council,” ula bynrap.
“Khlem kine ki lynti kiba shongaiñ, ka jingpyntreikam ïa ka NEP ha ki College ba la pynïasnoh bad ka NEHU kan long ka bym don jingmut satia bad kan wanrah pynban ïa ka jingjynjar bad ka ban pynjot ruh wat ïa ka lawei pule jong ki samla pule ha ka 1st Semester,” ong shuh shuh u Prof. Kma.
