Nongstoiñ, Nohprah, 21: Ka Ïingkashari Special Judge (POCSO) West Khasi Hills, ka la hukum ban set phatok haduh 6 snem ïa uwei u nongleh beijot, u ba la leh ïa kane ka kam bymman pyrshah ïa iwei I Khynnah ha ka shnong kaba hap hapoh ka Nongstoiñ Police Station. U ne u runar u dei u ba la tip kyrteng u Phering Lyngkhoi bad la pynngat ïa u ha ka jingpynsajia katkum ki ar tylli ki kyndon jong ka POCSO bad ka IPC.
Katkum ka kyrwoh na u Superintendent of Police ka West Khasi Hills ha ka sngi balang, ka Ïingkashari ka la pynmih ïa kane ka hukum naduh ka 7 tarik Nohprah. Kane ka kam leh beijot ka dei kaba la jia naduh u snem 2018 bad la register case ïa ka ha Nongstoiñ Police Station katkum ka case no 52 (06) 2018 hapoh ka kyndon 5(m)/6 POCSO Act.
U la pyntip ba ka Ïingkashari ka la hukum set phatok haduh 5 snem ïa une u runar hapoh ka kyndon 10 jong ka POCSO Act lem bad ka kuna kaba T.10,000. Nalor kane la hukum ban set sa 1 snem ha phatok hapoh ka kyndon 363 IPC lem bad ka kuna kaba T.1000 tyngka.
