Nongpoh, Lber 22: Kumba ju long man la u snem, ka Raid Nongkharai ba hap hapoh ka Nongpoh Sirdarship mynta ka sngi ka la pynlong biang ïa ka Dorbar Raid ba shisien shisnem, na ka bynta ban ïa kren halor shibun ki phang kiba dei na ka bynta ka bha ka miat jong ka shnong ka thaw bad ruh ba wan rah ïa ka shongsuk shongsain ki paidbah hapoh ka Raid.
Ïa kane ka Dorbar Raid la pynlong ha Jyntru ha kaba la shim bynta naduh u Lyngdoh Raid, u Bah Moses Syngkli, u Secretary raid, u Bah Stephan Maring, u Assistant Secretary u Bah Vincent Makri ryngkat ki Rangabh shnong bad ki nongïalam shnong na ki shnong bapher bapher ba hap ha ka Raid Nongkharai hapoh ka Nongpoh Sirdarship ha Ri Bhoi District.
Kumba la pynpaw da u Lyngdoh Raid, u Bah Moses Syngkli, la ongba ka jingthmu jong kane ka Dorbar Raid, ka dei ban ïa tai ne ïa kren sani halor shibun ki phang kiba long na ka bynta ka bit ka biang, ka shongsuk shongsain bad kiwei kiwei ki mat ba hap ban ïa kren na ka bynta ban pynneh pynsah ïa ka jinglong kyrpang kiba don hapoh ka Raid Nongkharai.
U la ong ruh la ïa kren ruh halor shibun ki phang kum ka jingpyrkhing ba hap ban ïada ïa ka mariang, ban khang ka jingpynïap ïa ki mrad, ki doh um, ki sim ki doh bad ban pynneh pynsah ïa ki khlaw ki btap la donkam ban thung dieng khnang ban ioh jaka ki mrad bad ki sim ki doh.
“ ngi hap ruh ban shim ïa kita ki lad jingïada ban pynneh pynsah ïa ki khyndew ki shyiap, ki khlaw ki btap na ka bynta ka pateng ki khun ki kti bad la khang pyrshah ruh ban die jaka sha ki briew kiba shabar ka Raid khnang ba u khun u hajar hapoh ka Raid un dang ioh jaka na ka bynta ka pateng ban sa wan” ong u Bah Moses Syngkli.
Shuh shuh, u la ong ruh la shim ruh ïa ka raid ba ki nongïalam shnong ki hap ban shim ïa kita ki jingkitkhlieh halor ki rai ba la shim ha kane ka sngi bad khamtam ban pyntreikam hok ïa ki skhim sorkar bad kiwei kiwei ki lad jingmyntoi khnang ba ki shnong ki thaw bad ki paidbah kin dang kiew shaphrang ha baroh ki liang jong ka jingim, u la bynrap.
