Khliehriat, Nohprah 19: Ka Kynhun ïalehkai jong ka Thangskai Tiger SC kala long syndon ka lahduh ha ka lympung ïalehkai phutbol jong ka kyrdan Super Division Football Tournament-2024, kaba la tip kum ka 4th Kyrmen Shylla Contribution Trophy ïa kaba la pynïaid da ka East Jaiñtia Hills District Football Association (EJHDFA) kaba la long hynne ka sngi (19 tarik u Nohprah, 2024) ha madan EJDSA Artificial Turf, Diengshynrum, Khliehriat.
Haba phai sha ka jingïakhun Final ka kynhun ïalehkai jong ka Thangskai Tiger SC kala jop da 1-0 kol ïa ka Dhana CSC, ïa katei ka shikol na ka Thangskai Tiger SC la thep da u Solmon Sympli ha ka minit ba 69. Lyngba kane ka shikol ka Thangskai Tiger SC kala ïoh syndon ka lahduh mynta u snem 2024
Ïa kane ka lympung la wan ban pynhap pyrda da u ma Kyrmen Shylla uba dei ruh u MLA ka 6-Khliehriat Constituency kum u kongsan, ha ka jingdonlang ka kong Santa Mary Shylla (MLA) kum ka symbud kongsan ryngkat ki riew paw khmat ka thaiñ naduh ma Justine Dkhar MLA barim, ma Lasky Rymbai MDC, ma Finelynes Bareh MDC, u Gautam Warjri (ADC East Jaiñtia), ka Stephanie Rapsang (DSO East Jaiñtia District), ki Nongkitkam ka WJDSA & Saipung Block Sports Association, ryngkat ki Waheh Shnong & Secretary shnong ka thaiñ East Jaiñtia nalor kiwei de.
Ha kane ka sngi ïa ka nam Emerging player of the Tournament la ïoh da u Solmon Sympli na ka Thangskai Tiger SC, Goal of the Tournament la ïoh da u Sixkiru Lyngdoh naka R.Iawpynsing, Player of the match la ïoh da u Solmon Sympli naka Thangskai Tiger SC, Player of the Tournament la ïoh da u Harita Suchen naka Dhana CSC, Best Goalie of the Tournament la ïoh da u Shainbor Muksor naka Thangskai Tiger SC bad ka nam Best Team la ïoh da ka Dhana CSC.
La sam ruh ïa ka momentous sha ka National Referee (Level 5) ka kong Batbitbha Bareh kumjuh ïa ki Referees jong ka Association.
