Santosh Trophy: Lyngba u Donlad pynliem ka Meghalaya ïa ka Delhi

Shillong, Nohprah 19: Ki ar kol ba la thep da u Donlad Diengdoh (49’, 51’) ha ka kylla miet ki la ïarap ïa ka Meghalaya ban jop ïa ka Delhi da 2-0 kol ha ka jingïakhun jong ka Group B ha ka Senior Men’s National Football Championship na ka bynta ka Santosh Trophy 2024-25 ha Hyderabad hynne ka sngi Palei.
Ka dei ka jingïalehkai ba ka Meghalaya ka donkam ban jop namar lada jia ba ka ïoh khur duna poiñ kan buh ïa ka kynhun ha ka lynti kaba jwat ban poi sha ka quaterfinal ha kane ka lympung. Ka Meghalaya ka la ïakhaid ar kol bad ka Tamil Nadu ha ka jingïakhun ba nyngkong jong ka ha shuwa ba kan mad ïa ka nam rem ha ka Kerala da 1-0 kol ar sngi mynshwa. Katba ka Delhi pat ka dang wad ïa ka jingjop ban pynthikna ïalade ban rung sha ka Quarter final hadien ba ka la jop ïa baroh ar tylli ki jingïalehkai ba ladep ha ka wat khatduh.
U coach jong ka Meghalaya, u Bah Hering Shangpliang, u la pynkylla ïa uwei u player ha kane ka sngi- ha kaba u Fullmoon Mukhim uba la mynsaw la bujli da u Kevin Rymbai ha ka thup kynhun ba sdang, ha kaba u symbud kapten jong ka kynhun, u Damanbhalang Chyne u la phong ïa ka jingdeng kti (armband) jong u kapten.
Hadien ka jingïalehkai kaba la kut khlem don ba lah thep ha ka kylla step, u Donlad u la ïoh ban pynkhih ïa ar tylli ki kol ha ki san minit ba nyngkong jong ka kylla miet. Ka kol kaba nyngkong ka la wan hadien ka jingpyrshang jong u Damanbhalang, uba la kynjat tyngeh ïa ka bol kham na jngai ïa kaba u u Raj Mahato – rangap kol ka Delhi, u la lah ban khanglad shipor hynrei ka bol ka la sied pat ha ka jaka jong u Donlad, uba la pynstet ban shim ïa kane ka kabu bad pynkhih ïa ka kol kaba nyngkong.
Hadien nangta, shuwa ba ka Delhi kan leh eiei, u Donlad u la ïoh biang ban pynbud ïa ka kol kaba ar tang hapoh 2 minit mar ïa thep ïa ka kol ba nyngkong.
Ka Delhi ka la ïoh katto katne ki kabu ksiar kiba bha ban pynkhihjar hadien katei ka por hynrei u Siwel Rymbai – rangapkol jong ka Meghalaya u la lah ban ïada ym duna ïa ka arsien ban pynneh ïa ka jingïalehkai khlem da shah thep kol (slean sheet) ha kane ka jingïalehkai. Kane ka dei ruh ka sien ba nyngkong ba ka Delhi kam shym la lah ban thep kol bad ka dei ka sien kaba nyngkong ba kan shah thep kol ha Hyderabad.
Ki kynhun ba wan ha ka thup Top 4 na ka Group kin ïoh rung sha ka wat ïakhun QuarterFinal bad lyngba kane ka jingjop kan kyntiew ïa ka Meghalaya sha ka kyrdan ba lai da kaba kamai 4 poiñ. Ka Kerala ka lamkhmat ïa kane ka Group da kaba khur pura 9 poiñ hadien ba ka la pynliem ïa ka Odisha da 2-0 kol ha ka jingïalehkai kaba kham hashwa hynne ka sngi Palei. Ka Delhi ka dang ïaineh ha ka kyrdan ba ar da 6 poiñ, katba ka Odisha mynta ka don hadien ka Meghalaya da 3 poiñ. Ka Tamil Nadu (1) bad ka Goa (0) kin ïakhun mynta ka janmiet.
Hadien ka jingïakhun kaba tyngeh bad ka jingjop kaba dei hok ba kan ïoh, ka Meghalaya kan sa ïakhun biang ïa ka Goa ha ka Sngi U Blei ha ka por 2 shiteng nohphaisngi ryngkat ka jingkyrmen hynrei da kaba pyrkhat bha ba ka jingïakhun ban poi sha ka knockout kam pat kut.