Nongpoh, Jymmang 22: Ka Umdapdumu SC kala long ka lahduh haka lympung ïalehkai phutbol ba 2 sngi bala pynlong da ka KSU Umjong Unit, hadien ba kala lah ban pynliem noh ïaka Pahamsohbar haka jingïakhun phainal kaba la long ha madan ïalehkai ka shnong Shakhoikuna haka sngi Saitjaiñ.
Ïa katei ka lympung la pynhap pyrda noh da u Bah Lambok Rymbai Vice President ka KSU North Khasi Hills District haka jingdonlang ka kong Rona Khymdeit MDC barim ka Nongpoh, u Bah Cores Marweiñ ki nongïalam ka KSU bad kiwei kiwei ki riew rangbah.
Haba phai sha ka jingïakhun phainal ha katei ka sngi hapdeng ka Umdapdumu pyrshah ïaka Pahamsohbar ka jingïalehkai kala long kaba itynnad bad ïakhaid bha da ka jingtbit ki rangïalehkai na baroh ar liang bad naduh ba sdang ka kylla step haduh ba kut ka kylla miet ka jingïakhun ka ïakhaid ha kaba ym shym don ba ioh thep kol ha kaba naka liang ki referee kila rai ban pynshut noh da ka tie-breaker.
Dei haka jingïashut tiew breaker ba ka Umdapdumu kala lah ban pynliem noh ïaka Pahamsohbar da 6-5 kol ban rah syndon ïaka nam lahduh jong katei ka lympung.
Haba kren ha katei ka sngi naka liang u Bah Lambok Rymbai kum u kongsan u la ai ka jingïaroh ïaka KSU Umjong Unit kaba la shim ïa katei ka sienjam ban pynlong ïa katei ka tournament da ka jingangnud ban kyntiew ïa ki samla ïalehkai ha katei ka thaiñ kiba don ïa ka sap ïalehkai bad kyntu ïa ka KSU Umjong Unit ba kan dang ïai bteng ïa kum kane ka tournament ha ki snem ban wan.
Bad u la ong ruh ba kin dang pynïatylli ïa ki para samla hapoh shnong poh thaw bad ban long kita ki samla ki ban kyntiew bad ban ïada ïa ka Ri bad ka jaidbynriew kumba ka nongrim jong ka seng ka ïeng.
