Shillong, Jymmang 22: Ka kynhun ïalehkai kriket jong ka CMC Mawlai Kyntonmassar ka la pynliem ia ka kynhun CMC Mawtawar ha ka final da 34 run ban ïohrah ïa ka kriket ba pynlong da ka seng samla Katholik Kyntonmassar ba la tip kum ka 1st (L) John Paul Kharsyiemiong Memorial Cricket Tournament Knock Out ha madan shnong ha Kyntonmassar ha ka sngi Saitjaiñ ka 21 tarik u Jymmang, 2022.
Ka CMC Kyntonmassar hadien ba ka la rem ïa ka toss ka la mih madan nyngkong ban tied bad ka la lah ban thlieh 179 bad duh 4 wicket na ki 12 over ba la buh ban ïalehkai. Haba wan beh ïa ka thong ka Mawtawar ka la tied 134 run bad liem 9 wicket bad ka Kyntonmassar ka la jop da 34 run ban ïohrah ïa kane ka lympung ïalehkai kriket. Ha kane ka lympung ïakhun ki la don baroh 14 tylli ki kynhun ba la wan ban shim bynta na ki shnong bapher bapher hapoh Mawlai.
Ka Kyntonmassar kum ka lahduh ka la ïoh khur ïa ka song pisa ba 10,000 tyngka ryngkat ka trophy bad ka Mawtawar kaba la wan baar ka ïoh ïa ka song ba 6000 tyngka ryngkat ka trophy. Katba u samla Sanvert Kurkalang na Kyntonmassar u la ïoh khur ïa ka nam man of the match ha kane ka sngi.
Ïa ka trophy bad ka song pisa sha kaba jop ka Kyntonmassar la sam da u kongsan u MLA ka Mawlai u bah PT Sawkmie, katba sha ka Mawtawar kaba ar ba la sam da u Bah Teibor Pathaw, MDC Mawlai bad sha u bah ïoh man of the match la sam da u Bah Marbud Dkhar uba la shah khot kyrpang ha kane ka sngi kut.
Ha kane ka sngi la ïoh ïa ka jingkren na u Bah PT Sawkmie, na u Symbud Kongsan, bah Teiborlang Pathaw, na u Bah Marbud Dkhar ha ka jingdon ryngkat u rangbah shnong Dr. MarcoMatri, i kurim u bah Paul Kharsyiemiong, i kmie bad kiwei kiwei.
