Shillong, Jymmang 22: Ka PFR Football Club ka la rah ïa ka nam lahduh ha ka 1st Knockout Football Tournament ba la pynlong da ka Kyrshanlang Multi Purpose Co-operative Society ha Sumer Umbang Ri-Bhoi District.
Ïa kane ka lympung ba la sdang naduh ka 7 tarik kaba la kut noh ha ka 21 tarik Jymmang la wan ban pynhap pyrda noh da ka Kong Macdalyne Sawkmie Mawlong kaba dei ruh ka MDC jong ka Umsning konstitwensi bad ha kane ka lympung la wan ban ïashim bynta da 15 tylli ki kynhun na kylleng ka jylla. Ka jingpynlong ïa kane ka lympung ïalehkai ka long ruh shi bynta ka jingrakhe ïa ka jingdap shi snem jong ka Kyrshanlang Society.
Ka PFR Football Academy ka la ïoh rah nam lahduh hadien ba ka la pynliem noh ïa ka Iaineh Football Club ha ka jingïashut tie-breaker da 6-5 kol.
Ka jingïakhun final hapdeng kine ki ar tylli ki team ka long kaba ishonshit bad ïakhaid bha da ka wan sakhi ki paidbah ieit football na kylleng ki shnong kiba don marjan bad ka Sumer Umbang.
Ha kaba kut ka jing ïalehkai na ka liang ka kong Macdalyne Sawkmie Mawlong ka la sam ïa ka song pisa ba T. 50 hajar lem bad ka trophy sha ka kynhun lahduh ka PFR Football Club bad kumjuh ruh ka la sam ïa ki takma sha ka Iaineh Football Club ka ba wan ba ar.
Haba kren kum ka Kongsan ha kane ka sngi ka Kong Magdalyne ka la kyntu ïa ki samla ban ïai trei shitom ha la ki sap ba ki don la kadei ha ka kam ïalehkai phutbol, ha ka rwai bad shad bad ha kiwei kiwei ki sap ba ki don.
Ka la ong ba ka jing pyndonkam ïa ki sap ba kum ki briew ki don kan ïarap ïa bun balang ban lait na kino kino ki jing ngop ha ki kam sniew khamtam ha ki kynja dih kiba pyn buaid bad kiwei ki kam be aiñ ba long pyrshah ïa ka imlang sahlang.
Ha kane ka sngi phainal la wan sakhi da ki paidbah nong shong shnong ha ka jing don lang ka kong B. Thabah ka President jong ka Kyrshanlang society, u Bah A. Nongrang Secretary lem bad ki dkhot ka HYC ka Ri-Bhoi District.
