Rah ka St. Paul’s HSS bad Nepali SS ïaka nam lahduh haka jingïalehkai tan tyllai bad Mawpoint ha Nongpoh

Nongpoh, Nailar 28: Ka ophis u District Sports Officer Ri-Bhoi, mynta ka sngi ka la ïoh ban pynlong ïaka jingïalehkai Mawpoiñt jong ki skul bapher bapher naka bynta ki khynnah khynthei bad ka jingïakop tan tyllai naka bynta ki shynrang hakaba la wan ban wan ban ïashim bynta da 6 tylli ki skul kiba don haka thaiñ Nongpoh shibynta ka jingrakhe ïaka National Sports Day ha madan NSCA Pahamsyiem.
Ha kane ka sngi la wan ruh ban sakhi lang da ka kong Margaret Pathaw ka thei ïakhun kti kaba la paw nam naka jylla bad ka Ri India, ka kong Vinnie Kharthangmaw ka thei ïakhun kti jong ka jylla bad u Bobby L Nongbet, DSO Nongpoh.
Haka jingïakop tan tyllai jong ki khynnah shynrang ka St. Paul’s Hr. Sec. School kala long ka nongjop hakaba ka la lah ban pynliem noh ïaka Ri-bhoi Presbyterian Hr. Sec. School bad haka jingïakop ïalehkai Mawpoiñt jong ki kynthei ka Nongpoh Nepali Sec. School ka la long ka nongjop da kaba pynliem noh ïaka Christian Hr. Sec. School.
Ka jingpynlong jong ka ophis u DSO ïa kine ki jingïakop mynta ka sngi ha Madan Pahamsyiem, ka long kum shibynta ban kynmaw burom ïa ka sngikha jong u rang ïalehkai Hockey jong ka Ri India u Major Dhyan Chand hakaba ka ri hi ruh baroh kawei ka ju rakhe ïaka sngikha jong une u rang ïalehkai kata ha man ka 29 tarik Nailar kaba la ai nam ai burom ruh ïa kane ka sngi kum ka National Sports Day.