Shillong, Nailar 28: Ka tnat ba dei khmih ïa ki kam lehkai jong ka sorkar jylla, kata ka Department of Sports & Youth Affairs kan pynlong ïa ka program kum shi bynta ban rakhe ïa ka National Sports Day mynta ka sngi, ka 29 tarik Nailar, 2023 ha Tennis Court, JN Stadium Complex, Polo Ground, Shillong.
ïa kane ka program la pynkhreh ban sdang ha ka por 3:00 baje nohphaisngi.
Kumban shu pynkynmaw, na ka liang jong ka sorkar jylla Meghalaya, naduh ka 22 tarik u Nailar, ka la pynbna da ka taïew lehkai sport bad kilanmet hapoh ka jylla da kaba pynshlur ïa baroh ki paid nongshong shnong ban ïashimbynta ha ki jingïalehkai bapher bapher kiba la pynkhreh ha kane ka taïew shuwa ba kan jam sha ka sngi ban rakhe ïa ka National Sports Day kaba dei ka lyngkhuh sngikha jong u player lehkai Hockey jong ka ri India, kata u Major Dhyan Chand, kaba long ha ka 29 tarik u Nailar.
Ha kane ka sngi ba ka Department of Sports & Youth Affairs ka la pynkhreh ïa ka prokram ban rakhe ïa ka lyngkhuh sngikha jong u tei u player Hockey jong ka ri, kan sa don ka jingpynkupburom ïa ki nongïalehkai Sports jong ka jylla kiba la jop ha ki jingïalehkai bapher bapher bad kiba la wanrah burom ïa ka jylla bad ka thaiñ ha ki lympung ba ki ïashimbynta kum ki nonglehkai Sports.
Hadien kane, kan sa don sa ka jingïalehkai phutbol paralok (Exhibition Football) ka ban long hapdeng ka kynhun Officers FC pyrshah ïa ka MLA FC ha MFA Turf, Polo Grounds, Shillong bad kane ka jingïalehkai kan sdang ha ka por 5:00 baje jan miet.
