Rah ka St Joseph HSS Nongkasen ïa ka lympung Inter School Sports ka Eastern West Khasi Hills

Nongstoiñ, Jymmang 20: Ka St Joseph Higher Secondary School Nongkasen kaba la jop haduh 13 tylli ki takma ksiar, 8 tylli ki takma rupa bad 10 tylli ki takma rnong, ka la long ka lahduh (Overall Champion) ha ka Inter School Athletics Meet 2022 jong ka Eastern West Khasi Hills District, ïa kaba la pynlong da ka ophis jong ka District Sports Officer, West Khasi Hills District, ha ryngkat ka jingïatreilang bad ka Forum For Change and Upliftment of Society (FOCUS) ha Madan Dommawlum, Pyndengumiong, Mairang.
Katba ka Kynshi Higher Secondary School, Kynshi ka la ïoh ïa ka nam jop ha ka jingïakhun March Pass Competition, Nangta ka Myrïaw RMSA Secondary School, Myrïaw ka la jop ïa ka khusnam Best Discipline Team. Kine ki khusnam baroh la sam hynne ka sngi ba kut noh ka lympung.
Ha kane ka sngi, u Lamphang ka Ïing Dorbar Thaw Aiñ ka jylla, u Bah Metbah Lyngdoh u la wan kum u kongsan ha ka jingïadon ryngkat u Superintendent of Police ka Eastern West Khasi Hills District, u Bah M.B Syiem, u Additional Deputy Commissioner ka Eastern West Khasi Hills District, u Bah A. Nongbri, I District Sports Officer ka West Khasi Hills District, I Kong B.Syiem, kiwei kiwei pat ki kynthup ïa ki nongtrei sorkar, ki nongïalam shnong ka thaiñ, ki nonghikai bad ki khynnah skul.
Haba ai jingkren ha ka jingïalang pynkut ïa kane ka jingïalehkai Athletics kaba lai sngi ïa kaba la ïoh ban sdang ha ka 18 tarik mynta u bnai, u Lamphang ka Ïing Dorbar Thaw Aiñ ka jylla Meghalaya, u Bah Metbah Lyngdoh u la pynpaw ïa ka jingkmen ban ïohi ïa ka jingïashimbynta shitrhem jong ki khynnah pule ka thaiñ.
U la ong ruh ba ki jingïalehkai bad jingkilan met, kumba long ka jingpule kot, ki long kiba donkam haduh kata namar ki ïarap ban pynthanda ïa ka jabieng ki khynnah pule bad lyngba ki kam ïalehkai, ki khynnah ki lah ruh ban ïoh ïa shibun ki jinghikai na ka bynta ka jingim ba man ka sngi ka jong ki.
Haba kren halor ka ‘No Tobacco Campaign’ kaba long ka campaign jong ki khynnah pule pyrshah ïa ka jingdih bad jingbam duma, u Bah Metbah u la pynpaw ïa ka jingsngewdiaw halor ka jingkharoi ki kam sniew hapdeng ki samla ka jylla kaba kynthup ïa ka jingdih droks, ka jingshongkha khynnah bad kumta ter ter.
U la khot la wer ruh ïa ki nonghikai bad ki khynnah pule ka thaiñ ba kin long ki nongkit ‘tien syiem ki ban trei shitrhem ban ïarap pynduh jait ïa ki jingsniew kiba kum kine na ka Distrik bad ha ka jylla hi baroh kawei.