Nongstoiñ, Naitung 07: Ka lympung West Khasi Hills District Level Subroto Mukherjee Cup Football Tournament 2023, kaba la neh kumba 10 sngi ei ei, ka la poi noh sha kaba kutha ka sngi thohdieng.
Ha ka liang jong ki shynrang Under-17 ka Sib Singh HSS ka la pynliem hynne ka sngi final pyrshah ïa ka JJM Nicholas Roy da shi kol la nod. Ïa kane ka kol la thep da u Pynbianglang Kharsyntiew ha ka minit kaba 15.
Kumjuh ruh ha ka liang Under-17 ki kynthei, ka Sib Singh HSS ka la pynliem ïa ka BBC SS Steplanglur da shi kol la nod, ha kaba ka Ibadondor Nongsiej ka la thep ïa ka kol ha ka minit kaba 26.
Katba ha ka Under-14 jong ki khynnah shynrang, ka St Peter’s HSS ka la pynliem ïa ka St Anthony’s SS da shi kol la nod. Ïa kane ka kol la thep da u Banshanskhem Nongphud ha ka minit kaba 54.
Da kine ki nam jop ka Sib Singh HSS bad St Peter’s HSS, kin pynkhreh pat ïalade mynta na ka bynta ka State Level, ïa ka ban sa pynlong shen ha nongbah Shillong.
Hadien ba la kut ki jingïalehkai la sam ïa ki khusnam Best Player (Under-17 Girls) sha ka Helendamary Thabah jong ka BBC SS Steplanglur. Ha ka liang ki shynrang (Under-17) la khur da u Pynbiang-lang Kharsyntiew jong ka Sib Singh HSS. Katba u Bankiew Lyngdoh jong ka Nongstoiñ Public School u la khur ïa ka nam Best player ha ka kyrdan Under-14.
Nalor ka DSO Kong Balarina Syiem, la donlang ruh da u kongsan u R.G Momin MLA ka Rambrai bad kiwei kiwei ki kynrem ki lyndan kiba la sam ïa ki khusnam sha ki nongïalehkai.
