Rah ka Laitjem CC ïa ka nam lahduh jong ka 2nd District League T20 Cricket Tournament 2023

0

Shillong, Lber 06 : Ka Laitjem CC ka la ïoh rah nam lahduh ïa ka lympung ïalehkai kriket 2nd District League T20 Cricket Tournament 2023 ba la pynïaid da ka East Khasi Hills Cricket Association (EKHCA).
Ka Laitjem CC ka la ïoh rah ïa katei ka nam lahduh hadien ba ka la lah ban pynliem noh da ki 3 wicket ha ka jingïalehkai phainal pyrshah ïa ka Hurdles CC ha ka sngi Nyngkong ha Shortimai Syiem Stadium, Smit.
Haba phai sha ka jingïalehkai phainal hapdeng kitei ki ar tylli ki team ha ryngkat ka jingwan sakhi ki paidbah kiba la ai ka jingkyrshan ïa la ki jong ki kynhun, ka Hurdles CC kaba la jop ïa ka jingkynting pisa ka la kam trai ban tied nyngkiong ha kaba ka la ïoh ban kamai 105 ron khyllem noh 10 wicket ha ki 19.3 ver.
U Sandy Stone Kharshandi u kamai bun ron tam na ka bynta ka kynhun da 31 ron na ki 25 bol katba u Arnold Shadap u khur 4 wicket ai kamai 20 ron ha ki 4 over bad u Mebanshan Kharsati u ïoh 2 wicket ai kamai 12 ron ha ki 3.3 over na ka bynta ka Laitjem CC.
Ha ka pali tied, ka Laitjem CC ka la lah ban pyndep ha ki 19.5 over da kaba kynjoh ïa ka thong sha ka 106 duh noh 7 wicket bad u Mebanshan Kharsati udei u rangtied ba kamai bun ron tam da 26 ron na ki 29 bol katba u Ricky Stone Nongbet u ïoh 2 wicket ai kamai 17 ron ha ki 4 over bad u Nangkiewkupar Disiar u ïoh 1 wicket ai kamai 12 ron ha ki 4 over na ka bynta ka kynhun jong ka Hurdles CC.
Ha kaba kut jong ka jingïalehkai la sam ïa trophy nam lahduh nalor ki khusnam shimet ba kynthup ka Player of the Match la ïoh da u Mebanshan Kharsati bad ka khusnam Player of the Tournament la ïoh da u Ricky Stone Nongbet, baroh arngut kidei jong ka Laitjem CC.
Ha kane ka sngi la wan ban sakhi lang ïa ka jingïalehkai phainal naduh u President jong ka Meghalaya Cricket Association u Naba Bhattacharjee, u Dhruva Thakuria uba dei u Treasurer jong ka MCA, u Bah P. Lyngdoh Nongbri Sordar jong ka shnong Smit, ki nongkitkam jong ka EKHCA nalor kiwei kiwei.

Leave A Reply

Your email address will not be published.