Hadien ba wanphai na Saudi Arabia shah pdiang burom ka kynhun ïalehkai Meghalaya

0

Shillong, Lber 06 : Watla ka kynhun ïalehkai jong ka Jylla Meghalaya ka la mad noh ïa ka jingshah rem da 3 kol la 2 ha ka jingïakhun phainal pyrshah ïa ka kynhun ïalehkai na ka jylla Karnataka kaba la long ha Riyadh, Saudi Arabia ha ka 4 tarik u Lber, 2023, hynrei ka long pat ka burom kaba khraw ïa ka jylla Meghalaya ba ha ka sien ba nyngkong eh ka la poi shaduh ka jingïakhun phainal ha ka lympung ïalehkai football jong ka Santosh Trophy.
Kum ka jingai mynsiem ïa kane ka kynhun ïalehkai jong ka jylla, na ka liang jong ka Khasi Students Union bad ka Federation of Khasi Jaiñtia and Garo People ki la pdiang sngewbha bad pynkup burom ïa kane ka kynhun tang shu poi ha Mawlai Petrol Pump.
Na ka liang ka Hynniewtrep Youths Council ha kane kajuh ka sngi ka la pdiang burom ïa ki rangïalehkai jong ka Meghalaya Football Association kaba la wan phai noh sha la ka jong ka jylla tang shu poi ha Mawiong Umjapung da kaba pynkup jaiñ ryndia tang shu wan phai na Saudi Arabia
Ka kynhun ïalehkai jong ka Jylla Meghalaya ka la shah rem noh ha ka jylla Karnataka da 3-2 kol ha ka jingïakhun phainal jong ka lympung ïalehkai Santosh Trophy kaba la long ha Riyadh, Saudi Arabia.
Ka jingpdiang burom jong ka HYC ïa kane ka kynhun ïalehkai ka long ban ai mynsiem bad ban bsut ha ki ïa ka mynsiem ïakhun ban minot thop watla ki la shah rem noh ha kane ka kynti.

Leave A Reply

Your email address will not be published.