Mawkyrwat, Ïaïong, 21: Ka ophis jong u District Sports Officer, South West Khasi Hills District mynta ka sngi u la ïoh ban pynkut noh ïa ka lympung jing ïalehkai jong ki khynnah skul kaba la tip kum ka Ranikor Block Level Inter-School Athletics Meets 2023 ha kaba ka Jingaiti Secondary School ka la rah ïa ka lahduh na ka liang jong ki khynnah shynrang bad ka Indira Gandhi Memorial Secondary School na ka liang jong ki khynnah kynthei.
Ïa kane ka Ranikor Block Level Inter-School Athletics Meet 2023 la pynïaid da ka ophis jong u District Sports Officer, South West Khasi Hills District, Mawkyrwat lyngba ka District Sports Promotion Society, South West Khasi Hills District bad ba la pynlong ha madan Nolikata, South West Khasi Hills District ha kaba ki don baroh 12 tylli ki skul na kylleng ki shnong kiba hap hapoh ka Ranikor Block kiba la wan ïashimbynta.
Lah ban kdew ruh ba kane ka jingïalehkai, ka long kum shibynta ban jied ïa ki khynnah ba kin ïoh ban rung ha ka District Level bad ka dei ruh kawei na ki lad ba ki khynnah skul kin ïoh ban pyni ïa ka jinglah jong ki ha ki kam ïalehkai bapher bapher bad da kata ka lynti yn sa jied ïa kiba kham kynsai ba kin sa mih khmat de ha kiwei pat ki jaka.
Ha kaba kut jong ki jait jingïalehkai ha kane ka sngi, na ka liang ka ophis u District Sports Officer, South West Khasi Hills District u la ïoh ban sam ïa baroh ki khusnam sha ki khynnah kiba la poi sha ka thong jong ka jingjop kata ha ka kyrdan ba nyngkong, kyrdan ba ar bad kumjuh ruh ha ka kyrdan kaba lai ryngkat ki khusnam bad ki syrnod ban pynshisha ïa ka jingjop jong ki.
Kyrpang ruh ha kane ka sngi la ïoh ruh ban sam ïa ki khusnam shimet kata ka Best Athletes jong ki khynnah ba 14 ka leit sha u Pailadonbor K. Ryja jong ka Nongnah Secondary School bad ka Chikimesa D. Shira jong ka Border A’chik Secondary School, ha ka kyrdan jong kiba 16 snem pat ka leit sha u Interlis John Nongbri jong ka Jingaiti Secondary School bad ka Nengchi Sangma jong ka Indira Gandhi Memorial Secondary School.
Nangta, jong ki khynnah ba 18 snem ka leit sha u Badol A. Marak jong ka Border A’chik Secondary School bad ka Risdalin Hahshah jong ka Jingaiti Secondary School.
Ha kane ka sngi ban pynkut noh ïa kane ka Ranikor Block Level Inter-School Athletics Meet 2023 la ïadonlang naduh u bah D. Syngkon, District Sports Officer, South West Khasi Hills District, u bah E. Syiemlieh, PTI ka ophis u District Sports Officer, South West Khasi Hills District, ki Medical & Health Officer jong ka Ranikor CHC, ki nonghikai jong ki 12 tylli ki skul lem bad ki nongpeit kai.
