Pyrshah u Waheh Shnong Umlong ïa ka Public Hearing ka M/s Wahriang Limestone Mine

Khliehriat, Naiwieng, 08: Ka jingpynsngew paidbah ba la pynlong ha ka sngi Balang ha ka shnong Umlong, East Jaiñtia Hills District halor ka jingthmu jong ka M/s Wahriang Limestone Mine ban khlong ïa u mawshun na ka jaka kaba heh 1.33 hectare ka ïaid beit watla na ka liang jong u Waheh Shnong bad kiba bun ki paidbah nongshong shnong jong ka shnong Umlong ki la pyrshah jur bad kynnoh ba kane ka jingpynsngew paidbah ka dei ka bym sngewthuh sngewthaw bad ka bym shai haei haei ruh.
Haba kren ha ka public hearing, u Waheh Shnong ka shnong Umlong, u Ma Charky Pohtam u la ong, “ngi tieng lada kane ka kam ka ïaid beit shakhmat ïoh kan dei pynban jong kano kano ka Company ngin shitom, ngin jynjar pynban ma ngi bad yn sa kynnoh ba u Waheh Shnong u la soi klumar ïa ki kot ki sla khlem da ka jingtip jong ka Dorbar Shnong bad khlem da ïoh jingmyntoi eiei jong ka shnong ka thaw. Na kata ka daw nga pyrshah ïa kane ka public hearing.”
U la ong, ha ka dorbar ba ladep pynlong, ka Dorbar Shnong ka la pdiang ban pynlong ïa ka public hearing kaba dei jong u Bah Bijen Rupsi. “Ym dei ma nga uba la soi ïa ka No Objection Certificate (NoC) hynrei dei u Waheh Shnong barim. Ha ka dorbar ngi ladep pdiang ïa kane bad ngi la dep bthah ruh ïa u Bah Bijen Rupsi ba un wanrah ïa ki kot ki sla ban bishar bniah bha ïa kaba u la kular ban wanrah. Baroh shi katta ki sngi, ym don ba pyrshah ïa kane, hynrei dei tad haduh hynnin ka miet sngi Baar ba ngi lap ïa ki jingthoh kiba pynbakla ïa ki jingthoh bad u Bah Bijen ruh haduh hynnin ka sngi u khlem wanrah ban pyni ai ki kot ki sla hynrei u wan ai tang ka dulir Land Holding ha nga,” la ïathuh u Waheh Shnong.
“Ha ka jingshisha nga ladep bthah ba un wanrah ki kot ban lait na kano kano ka jingpyrshah bad kumba paw ne mih ki notis jingpynbna ha ki kotkhubor ka paw ba kane ka wan na kompeni namarba ym don kata ka kyrteng jong u Bijen Rupsi ha ka kotkhubor. Kum u Waheh Shnong nga sngew phylla ïa kane namarba ha ka Dorbar Shnong ngi la ngeit ba ka dei Public Hearing jong u Bijen Rupsi hynrei da mynta pat ka dei da ka jong ka kompeni. Na kata ka daw ngi pyrshah,” la ong u Waheh Shnong.
Ka Kong Rinaroy Bareh, kaba dei Executive Member jong ka Dorbar Shnong Umlong ka la pynshisha ba ïa ka NoC la pdiang ba la ai halor kane ka jingthmu ban khlong mawshun da u Waheh Shnong barim ym da u Waheh Shnong ba thymmai.
“Kane kam dei shuh ka Public Hhearing, ka paw ba ka Public Hearing ka ladep ïaid shakhmat, ki jingïateh bad ka shnong kim myntoi eiei, ha ka por mynshwa ruh ngi pyrshah, nga te ngam lah ban shaniah ïa kane,” ka la ong.’
“Naduh ba sdang ka jingthmu ban tih mawshun ki la leh donbor, dei hadien ba ngi la lap lyngba ka RTI na ka Forest Department ngi lap ïa ki kot ki sla ngim kwah ban ïaid shakhmat namar ngi kwah ban wanrah ïa ka jingïasngewthuh jingmut hapoh ka shnong ba kin wan da kaba ïa burom ban ym jia kano kano ka jingïapeit khmat iwei ïa iwei. Ka jingpan ïa ka NoC ka long tang ban shu pyndep rukom bad haduh mynta ngim pat ïoh ban bishar bniah la kane ka ktah ne kam ktah ïa ka shnong ka thaw. Ngim pat tip ka jngai haduh katno na kata ka wah Riang. Kiba kyrshan ïa kane ki la ïaid shakhmat, kim wanrah ha kata ka sur ban ïa sngewthuh jingmut. Haba ha ka 5 tarik ba la pynmih notis ruh ngi ki nongshong shnong ngim don jingtip, ki la ïaid lait ïa ka shnong bad na kata ka daw ngi pyrshah. Ka resolution ruh naei ki ïoh? Ngi don ka hok ban pyrshah,” ka la ong.’
“Ha ka por ba long dorbar shnong, ngi la mynjur ban ai NOC bad ki kyndon shnong ruh la dep buh, hynrei ngam kwah pat ba ka company kan wan ha shnong na kata ka daw ngi pyrshah” ong kiba pyrshah bad bynrap ruh ba kane ka jingpynlong public hearing ka dei ka bym sngewthuh sngewthaw bad ka kyrteng jong u Bijen Rupsi ruh ka khlem paw ha ki notice ba pynmih ha ki kotkhubor, “Lada dei shisha ka par mawshun jong u Bijen Rupsi te ngi ai ka jingkyrshan, hynrei ïoh lehse kam dei ka jong u ïoh dei pynban jong kano kano ka company kane ka buh jingeh ïa ka shnong” pynpaw kiba pyrshah bad sngewkhia ruh ïoh ka jingtih mawshun kan ktah ïa ka mariang bad ktag ïa ka shnong ka thaw.
Na ka liang kiba kyrshan ki la pyni ïa la ki nongrim jong ki. U MLA barim jong ka Khliehriat Constituency u Ma Justine Dkhar uba kyrshan ïa kane ka public hearing u la ong, “ u Bijen Rupsi, u dei u trai shnong jong ka shnong Umlong, nga sngewba ïa ka jingïatehkular ruh ka ladep, ïa ka NOC ruh la dep ban siew na kata ka daw hap ban pyrkhat bha ha shwa ban shim ïa kano kano ka rai hadien ïoh phi babe. Ngi ïohi ba ka kompeni kylleng kylleng ka shna ïa ki Mining hynrei mynta da leh da u briew la jong pat ngi artatien pynban, balei ban artatien namar ïa kiba wan nabar ki dang lah ban ïaid shakhmat,” u la ong.
“Ngi ïohi ba u Blei u la ai ïa kine ki jingkyrkhu ba ngin ïoh ban pyndonkam na ka por sha ka por ka wan ka jingkylla, nga sngew ban ong ba u Bijen Rupsi u dei u para shnong jong phi ha Umlong. U la ïaid lynti ïa kane ka kam baroh bad ki kot ki sla ki ladep ban pynbiang lut ha ka kyrteng jong u. Nga kyrpad ïa ki heh sorkar ba kin pynshai ïa kane ba ka dei ha ka kyrteng u Bijen Rupsi. U sa nud ban ïaid shakhmat ruh dei namar ba u ïoh ïa ka NoC na ka shnong bad lada ym don ka NoC nga tharai um nud ban ïaid shakhmat. Lada pyrshah ka long kumba shun ïa u. Na ka liang jong nga, nga kyrshan pura ïa kane ka public hearing jong ka M/s Wahriang Limestone Mine kaba long trai da u Bijen Rupsi,” u la bynrap.
U Secretary Shnong ka shong Umlong, u Ma Silad Pohtmi, u la ai ka jingkyrshan ba pura ïa kane ka public hearing bad ong ba ka Dorbar Shnong ka ladep ban pdiang ïa kane bad ïa ki kot ki sla ruh ki la biang lut ka pisa ruh u Bijen Rupsi u la dep siew.
U Environmental Engineer jong ka Meghalaya State Pollution Control Board (MSPCB) u Bah F.Laloo, u la pynshai ba kane ka public hearing ka dei ka rynsan kaba ki paidbah ki pynsngew ïa ki jingkyrshan bad ïa ki jingpyrshah jong ki bad ïa ka kaiphot yn sa phah sha ka tnat kaba dei peit ka State Assesment Impact Authority, Shillong bad ïa ka rai ban ai ne ban nym ai ïa ka Environmental Clearance kam dei na ka ophis jong ka Pollution Control Board bad kam dei ruh na ophis u Deputy Commissioner jong ka East Jaiñtia Hills District hynrei dei ka ophis State Assesment Impact Authority (SAIA).