Shillong, Nohprah, 06: U MLA jong ka BJP Meghalaya u Bah Sanbor Shullai ha ka sngi Thohdieng u la ïathuh ba shen un sa phah da ka jingthoh sha u Myntri Rangbah ka Jylla Assam u Himanta Biswa Sarma ban pynpaw ïa ka jingpyrshah halor ka rai ba la shim da ka Sorkar Assamban khang bam doh ïa ka masi.
Ha ka jingïakren bad ki lad pathai khubor, u Bah Shullai u la ong ba ym don satia ha kano kano ka bynta jong ka pyrthei lane hapoh ka riti synshar jong ka ri India, ym don satia kano kano ka aiñ ba pyrkhing ne khang ban bam ïa kano kano ka jait doh.
U la ïathuh ba un sa phah da ka jingthoh sha ka Sorkar Pdeng bad sha ka Sorkar Assam halor kane.
“Nga ladep pynkhreh ban phah ïa ka jingthoh sha ka Sorkar Pdeng bad ïa ka kopi ngan sa phah ruh sha u Myntri Rangbah ka Assam u Himanta Biswa Sarma bad ngi sngew mong bad ngi diaw ba um dei satia ban shim kum kane ka rai. Ngi don ïa ki aiñ ban teh ïa ki nongleh bymman hynrei ha ka bam ka dih kim dei ban khang,” u la ong shuh shuh.
“Haba phi leit sha kylleng ka pyrthei, sha Bangkok, Malaysia, Indonesia, sha ki ri Europe bad ri hapoh Asia, ki bam ïa ki bseiñ, ki khnai, ki khñiang, ki ñianglartham hynrei kam don jingpyrkhing satia. Hynrei balei ki (Sorkar Assam) pyrkhing ban bam ïa ka doh masi. Nga pyrshah jur ïa kane (ka rai),” ula ong.
Da kaba pynpaw ba ha Meghalaya, ka dei ka mon jong ki paidbah, u Bah Sanbor u la ong ba ar bnai mynshwa ma u ruh u dang bam doh ksew bad ka kurim.
“Ngi bam doh ksew. Nga ju bam doh ksew haba nga dang samla. Mynta dang ar bnai ruh, u paralok jong nga u dang phah ïa ka doh ksew bad nga bam lang bad i menkmie. Yn leh aiu? u la bynrap.
U la kynthoh ruh ïa ka jingkhang bam doh masi da ka Sorkar Assam da kaba ong, “balei phi shu khang syndet? Ka dei ka jingkwah jong phi lada phi bam ïa u bseiñ ne phi kwah bam doh masi.”
U Bah Sanbor u la kular ba kum kine ki jingpyrkhing yn ym shah satia ban wanrah ha Meghalaya.
“Nga ieng skhem, hangne kan ym jia. Katba u Bah Sanbor u dang im, ngan ym khang. Kane ka dei ka jylla laitluid. Ngi lah ban bam ïa u bseiñ, ka masi, ka ñianglartham, ki khñiang katba ngi kwah. Bam beit katba mon. Ka Christmas kane ka la wan hajan. Bam katba kwah. Ngin leh kmen, Christmas bad snem thymmai basuk,” u la ong.
Haba kylli, une u MLA ka BJP u la ong, “nga don hangne kum u BJP Sanbor. Ka rukom treikam BJP jong nga ka ïapher. Ha Assam ka rukom treikam ka ïapher. Hangne ka dei ka BJP Sanbor.
