Nongpoh, Nohprah 05: Hadien shibun ki jingujor naki paidbah, ki nongïalam shnong halor ka jingthmu ban pynkynriah noh ïaka Umsning C&RD Block bad ka ophis u BDO na Umsning Lum Nongrim, sha lad Umpih, ki nongïalam jong ka HITO, Ri-Bhoi District mynta ka sngi kila leit ban ïakynduh syndon ïa u BDO ka Umsning C&RD Block u Raja Brahma ban wad jingshai bad ka jingtip ba thikna halor katei ka jingthmu ban pynkynriah noh ïaka ophis treikam naka jaka kaba don mynta ha Umsning, Lumnongrim.
Haba kren sha ki lad pathai khubor naka liang u Bah Ban Kharnaior President ka HITO Ri-Bhoi District u la ong ba kum ka seng ka dap da ka jingsngewkhia halor ka jingud ki paidbah bad ki nongïalam shnong bad ka jingsngew lyngngoh kaba jur halor ka jingthmu ban pynkynriah noh ïaka C&RD Block sha Lad Umpih, ba kum ka seng kam lah ban pdiang da lei lei ruh ïa katei ka jingthmu.
U Bah Ban Kharnaior u la ong ruh ba ha ka jingleit kynduh jong ka seng ïa u BDO la lap ba kadei ka jingthmu pynkynriah ka dei ka jingkwah shimet jong u BDO kaba lah ban don kaei kaei sha lyndet, namar katei ka jaka kaba thmu ban pynkynriah thymmai ka dei ka jaka jong ki briew kaba don kumba 2 akar ka jingheh hynrei haba kylli ïa katei ka jaka ba ka ophis ka don mynta ka don kumba 5 akar kaba la pynlyngngoh ngaiñ ïaki nongïalam ka seng ba kumno yn rah ïaka ophis treikam naka jaka kaba heh shaka jaka kaba rit kaba la pynsuba sniew ïaki nongïalam seng b aka lah ban don kaei kaei sha lyndet jong ka jingkwah ban pynkynriah ïa katei ka ophis treikam.
“U BDO lada u kwah ban pynkynriah ïaka ophis treikam jong ka Block u dei ban ïakren bad twad jingmut ruh naki Rangbah Shnong halor ka jingthmu, um dei ban shu rai shimet la ka biang ne em ban pynkynriah, namar kumba long mynta ki paidbah, naduh ki nongïalam shnong ki suk haka leit ka wan ha katei ka jaka kaba la ju don baroh shi katta, wat ki paidbah kiba wan naki thaiñ Mawhati, hynrei lada sha katei ka jaka ba pynkynriah thymmai ki paidbah ki hap ban wai da ki kali kaba lah ban ktah ar shah ïaka jinglut jingsep bad ka bai leit bai wan” la ong utei u nongïalam ka HITO.
U la ïathuh ruh baka seng kala ioh jingtip ba shen yn sa plie ruh ïa u mawnongrim ban tei ïa katei ka ophis treikam ba thymmai jong ka Block ha Lad Umpih bad kum ka seng ka kren shai ba kam ailad da lei lei ruh ban pynkynriah ïa katei ka ophis treikam naka bynta ka jingsuk jong ki paidbah haka leit ka wan.
